1 Avami 16 - KITABU KITAKATIFU

¹ Yahova yamoloma ku muporofeti Jehu muyaayi wa Hanani kandi naamuha makuva ku Baasha:

² “Ivi siwaali mundu wamanyikana mba, navuzwa ndakokola mwimiliri wa vandu vange Isiraeli. Na kalunu umali kokora vwoni kuli Jeroboamu kandi umali kwimilira vandu vange kuduuka mu vwoni. Vwoni vwavo vumali kuvukiza vutima vwange,

³ kandi ndio inzi ndatulizaho harara na vinyumba yooyo, kandi ndakora inyumba yooyo kuli inyumba ya Jeroboamu muyaayi wa Nebati.

⁴ Ku woosi oveeye ku vinyumba yooyo ukuzira mu madaala manene alaliivwa ni zimbwa, na ku woosi ukuzira mu milimi alaliivwa ni zisoti.”

⁵ Vindu vindi viosi via Baasha yakola kandi vikolwa viuvuluviliri vwivwe viang'odwa mu vitabu via makuva ga kale ga avami va Isiraeli.

⁶ Baasha yakuza kandi nayavirwa mu Tiriza, kandi muyaayi weve Ela yavugula ovogono vwivwe kuli mwami.

⁷ Likuva yilio kutura ku Yahova ku Baasha harara na vandu vinyumba yeeye liahaanwa kuvitira ku muporofeti Jehu kigira vwoni vwa Baasha yaakolera Yahova. Yavuukiza vutima vwa Yahova sigali kigira vudamanu vwa yakola, vweng'ine kuli mwami Jeroboamu yakola imbiri weve, navuzwa kandi kigira yita vandu vinyumba ya Rehoboamu, vosi

Mwami Ela wa Isiraeli

⁸ Mu muhiga gwa sirini na sita gwu vwamihi vwo mwami Asa wi Ivuyuda, Ela muyaayi wa Baasha yakolwa mwami wa Isiraeli, kandi yamiha mu Tiriza ku mihiga giviri.

⁹ Zimuri, mulala ku vanene veve waali mwimiliri wi inusu ya magare gu vulwani gu mwami, yamuzira hasi. Lidiku lilala mu Tiriza, Ela yaali nahambika muinyumba ya Ariza, waali mulindi wi nyumba yu vwami.

¹⁰ Zimuri yingira mu nyumba zana kandi niyiita Ela, kandi navugura vogono vwivwe kuli mwami. Yaga gekoleka mu muhiga gwa sirini na saba gwu vwamihi vwa Asa wi Ivuyuda.

¹¹ Lwa Zimuri yakolwa mwami, yita vandu inyumba ya Baasha vosi. Vuli mwiko anoho mulina wikisaza yitwa vugira kuleka kali mulala.

¹² Kunangwa Zimuri yadiviza vandu avinyumba ya Baasha yoosi, kolondekana ni likuva lia Yahova yamoloma ku Baasha kuvitira mu muporofeti Jehu.

¹³ Kigira lisigamira misambwa liavo kandi kigira vimilira Isiraeli kokora vwoni, Baasha nu muyaayi weve Ela vavuukiza vutima vwa Yahova Nyasaye wa Isiraeli.

¹⁴ Vindu vindi viosi via Ela yakola, viang'odwa mu kitabu cha makuva ga kale ga avami va Isiraeli.

Mwami Zimuri wa Isiraeli

¹⁵ Mu muhiga gwa sirini na saba gwu vwamihi vwo mwami Asa wi Ivuyuda, Zimuri yamiha mu Tiriza ku Isiraeli ku madiku saba. Amahi ga Isiraeli gaali nigakumbirizaa lidaala linene lia Gibezoni mu Filisitia;

¹⁶ lwa vahulira ndi Zimuri umali kuziira mwami hasi nukumwiita, hene na hene yaho, valandiza makuva ndi mwimiliri wa mahi wavo Omuri kuva mwami wa Isiraeli.

¹⁷ Omuri na mahi geege vaatura Gibezoni ni vazia kwingilira Tiriza.

¹⁸ Lwa Zimuri yalora ndi lidaala linene zana limali kugwa, yingira mu imbinga yumugati yinyumba yu vwami, nasamba inyumba yu vwami, na yaahia nakuzira mu muliru.

¹⁹ Yaga gekoleka kigira vwoni vwivwe ku Yahova. Siyaayanziza Yahova kuli Jeroboamu waali imbiri weve, yaayanza kwimilira vandu kokora uvwoni.

²⁰ Vindu vindi viosi via Zimuri yakola komeeda ku lilohiza lie vindu viosi viang'odwa mu kitabu cha makuva ga kale ga vami va Isiraeli.

Mwami Omuri wa Isiraeli

²¹ Ing'inga yeyo, vandu va Isiraeli vaavukana mu vidieli viviri, valala kuvo venya vakole Tibini muyaayi wa Ginazi ave mwami, na vandi nivava mu liyaanzilira Omuri.

²² Mu limalirika, yavo vaali ni liyaanzilira Omuri vaguuta; Tibini yakuza na Omuri yakolwa mwami wa Isiraeli.

²³ Kunangwa mu muhiga gwa salasini na moja gwu vwamihi vwu mwami Asa wi Ivuyuda, Omuri yakolwa mwami wa Isiraeli, na yamiha ku mihiga likomi na giviri. Mihiga jukutanga sita yamiha mu Tiriza,

²⁴ yaagula kiguru cha Samaria ku vidonye vie ifeza zielefu sita kutura ku mundu walangwa Shemeri. Omuri yumbaka imbinga ku kiguru zana, kandi ni yumbaka ku lidaala, naaligulika Samaria, kutura ku lieta “Shemeri”, waali mwene kiguru.

²⁵ Navuzwa Omuri yakola vwoni mu zimoni zia Yahova, kuvita yavo vosi vaali imbiri weve.

²⁶ Kuli Jeroboamu muyaayi wa Nebati waali imbiri weve, yavuukiza vutima vwa Yahova Nyasaye wa Isiraeli kigira vwoni vwivwe kandi kigira kwimilira vandu va Isiraeli kokora vwoni na kusigamira vifananyi.

²⁷ Vindu vindi viosi via Omuri yakola, ni miyinzi jije ja yatwekiza josi jang'odwa mu kitabu cha makuva ga kale ga vami va Isiraeli.

²⁸ Omuri yakuza ma nayavirwa mu Samaria, nu muyaayi weve Ahabu yavugula vogono vwivwe kuli mwami.

Mwami Ahabu wa Isiraeli

²⁹ Mu muhiga gwa salasini na nane gwu vwamihi vwu mwami Asa wi Ivuyuda, Ahabu muyaayi wa Omuri yakolwa mwami wa Isiraeli, na yamiha mu Samaria ku mihiga sirini na mbiri.

³⁰ Yakola vwoni ku Yahova kuvita yavo vosi avaari imbiri weve.

³¹ Siyakola vuzwa vwoni kuli vwo mwami Jeroboamu; navuzwa yaavitilira naleta Jezebeli mukaana wu mwami Ezibaali wa Sidoni, ma natanga lisigamira Baali.

³² Yumbakira Baali litembeli mu Samaria, kandi naamulombera vwali kandi navuviika mu litembeli.

³³ Yalomba kandi kifananyi chu munyasaye wikikali Ashera. Yakola vindu vi nyingi ligali kuvuukiza vutima vwa Yahova, Nyasaye wa Isiraeli kuvita vausi vandi vosi vaali imbiri weve.

³⁴ Mu ing'inga yu vwamihi vwa Ahabu, Hieli kutura Bezeli yumbaka Jeriko vuhia. Navuzwa lwa yaali niyumbaka musingi gwilidaala yilio, muyaayi weve wimbiri walangwa Abiramu yakuza. Lwa yaaili namalirizaa Abiramu muyaayi wimbiri lwa yavika kwumbaka virivwa, muyaayi weve mukogoti walangwa Segubu yakuza yaga gekoleka kuli Yahova yaali navooleya Joshua kale.