1 Avami 12 - KITABU KITAKATIFU

Liebaala lie zihiiri zia Ivaale

¹ Rehoboamu yazia Shekemu uwa vandu vosi va Ivaale wa Isiraeli vaali nivavungi kumukola mwami.

² Lwa Jeroboamu muyaayi wa Nebati, waali niyirukira Egebeti kutura ku mwami Solomoni, yahulira makuva yaga, yirana kutura Egebeti.

³ Avandu vi zihiiri zia Ivaale vaatumana yaaze. Maku vosi vazia harara ku Rehoboamu nivamuvoolera,

⁴ “Baba woovo Solomoni yaakwamiiha nuvululu, kandi naviika misigo miliduhu ku kunyi. Niiva ulakola misigo miliduhu yiji janguhi kandi niiva ulalomba limenya lietu live lidoto ku kunyi, kulava vandu vovo vasuuvirifu.”

⁵ Naye yavativulira, “Yirani hano inyima wa madiku gavaga na inzi ndamuha litivuli liange.” Kunangwa vaatura ni vazia.

⁶ Mwami Rehoboamu yateeva zing'anagani zia vasakulu vaali nivatumikaa kuli vahaani vi zing'anagani va Solomoni, baba weve. Yateeva, “Ni litivuli ki lia mbana ku vandu yava?”

⁷ Vaativura, “Niwenya utumikiri vandu yava vulahi, haana litivuli liveeye liukuyanziza ku liteeva, na valakutumikira nu vusuuvirifu vwosi kazozo.”

⁸ Navuzwa yachaya makuva gi zing'anagani zindahi zia vasakulu, na muvogono yivwo nazia ku vasoleri vaviruka harara naye kandi vaali nivagwiyi vahaani vi zing'anagani veve.

⁹ “Mumbezaa ganagani ki yangola? Nambolere ki avandu vandeva nombe misigo miliduhu jaavo jive miangu?”

¹⁰ Vaativura, “Yaga nigo ga udukana uvavoolere: ‘Kedete change chiinyasi keveeye kiliduhu kuvita kisindi cha baba wange!’

¹¹ Uvavoolere, ‘Baba wange yamudwika misigo miliduhu; inzi ndajikola miliduhu kali kuvita. Yaamukuyira olokova, navuzwa inzi ndamukuyira kevogo cha mafua!’ ”

¹² Inyima wa madiku gavaga, Jeroboamu na vandu vosi virana ku mwami Rehoboamu, kuli yaali niyavalaga.

¹³ Mwami yachaya zing'anagani zia vasakulu vamuha ma namoloma ku vandu nuvululu.

¹⁴ Kuli vasoleri vamuha zing'anagani. Yavoola, “Baba wange yavika misigo miliduhu ku munyi; inzi ndajikola miliduhu kali kuvita. Yaamukuya nolokova; inzi ndamukuyira kevogo cha mafwa!”

¹⁵ Vwali vulaliri vwa Yahova koleta makuva ga yaali niyamoloma ku Jeroboamu, muyaayi wa Nebati kuvitira mu muporofeti Ahija kutura Shilo. Yiki nicho chagira mwami naahuliriza mativuli ga vandu vamuteeva.

¹⁶ Lwa vandu valora ndi mwami siaveeye unyala kuvahuliriza vahanzuka, “Koveeye na lisanga ki na Daudi! Sikoveeye ni miandu nu muyaayi wa Jese mba. Avasaza va Isiraeli, Yirani mu mahema ginyu! Linda inyumba yooyo ivi mwene, Daudi!” Kunangwa vandu va Isiraeli vosi viirana mu mahema gaavo.

¹⁷ Kunangwa vandu va Isiraeli vibaara, nivaleka Rehoboamu kwamiiha kuli mwami ku avandu vamenya vuzwa mu kivala chi Ivuyuda.

¹⁸ Maku mwami Rehoboamu yatuma Adoniramu, waali mwimiliri wi miyinzi jukunigwa, azie ku vandu va Isiraeli, navuzwa vamulasa magina kuduuka nakuza. Kulwa gene yaga, Rehoboamu yakola vwangu naniina mu ligare lilie Liuvulwani ma niyirukira Jerusalemi.

¹⁹ Kutura lwene yilwo, vandu vu vwami vwa Ivaale wa Isiraeli vava mu vwibaali ku vwamihi vwi kisukururwi cha Daudi kuduuka lero.

²⁰ Lwa vandu va ivaale wa Isiraeli vahulira ndi Jeroboamu umali kwirana kutura Egebeti, vamugenihiza mu livugana lia vandu, kandi nivamukora ave mwami wa Isiraeli. Ihiiri ya Yuda yeng'ine yaatigara isuuvirifu ku visukululwi via Daudi.

Ovoporofeti vwa Shemaysa

²¹ Lwa Rehoboamu yaduuka mu Jerusalemi, yalanga harara avasikari valahi ligali 180,000 kutura mu zihiiri zia Yuda na Benjamini. Yatovola kuzia kulwaana nu kwilanyia vwamihi vwivwe ku zihiiri zia Isiraeli ziveeye ivaale.

²² Navuzwa Nyasaye yavolera muporofeti Shemaya

²³ ahaane makuva yaga ku Rehoboamu kandi ku vandu vi zihiiri zia Yuda na Benjamini:

²⁴ “Mutingiliri kulwaana avamwavo vinyu Isiraeli mba. Muzie yengo munyi mwosi. Gamali kwekoleka gaveeye mu vulaliri vwange.” Vosi vahulira lilaga lia Yahova ni virana yengo.

Jeroboamu Yagirung'ana koleka Yahova

²⁵ Mwami Jeroboamu wa Isiraeli yumbaka imbinga kukumbiriza lidaala lia Shekemu mu kivala chi vigulu cha Efuraimu. Kandi namenya yo ku ing'inga ngekeeke. Maku yatura mu niyumbaka imbinga yi lidaala lia Penueli.

²⁶ Jeroboamu yaganagana mwene, “Vwami vulirana ku inyumba ya Daudi niiva vandu yava vazia kuhaana visiuviliru viavo mu Litembeli lia Yahova mu Jerusalemi,

²⁷ valirana kuhaana uvusuuvirifu vwavo ku mwami wavo, Rehoboamu mwami wa Yuda. Valanzita kandi viirane ku mwami Rehoboamu.”

²⁸ Kunangwa inyima wukwenyeleriza zing'anagani, mwami Jeroboamu yalomba vimoli viviri vie zahabu. Yavolera vandu veve ndi, “Munyi vandu va Isiraeli, mwaziyange kusigamira Yahova mu Jerusalemi ku ing'inga indambi.”

²⁹ Yasingiriza kilala ku vimoli vigiriki viezahabu mu Bezeli na kindi mu Dani.

³⁰ Kekolwa yiki chaagwa vwoni, kigira vandu vazia kali kuduuka ha Bezeli na avandi ha Dani kusigamira vifananyi via vanyasaye wene yeyo.

³¹ Jeroboamu yumbaka kandi havundu hukusigamira kuzindongozi zie vigulu, kandi yatovola vasaalisi kutura mu zinyumba zitaveeye zie ihiiri ya Levi.

Lisigamira ha Bezeli liasuulwa

³² Jeroboamu kandi yatangiza lisavo ku lidiku lia 15 liu mweli gwa munane, kuli lisavo liali Ivuyuda. Vahaana visiuviliru ku vanyasaye vi vimoli vigiriki via yaali naalombi, kutura ku ifeza mu Bezeli, kandi yavika yo avasaalisi vatumika havundu hukusigamira misambwa ha yaali niyumbaki.

³³ Ku lidiku lia 15 liumweli gwa munane, lidiku liu mwene yaali natovoli, yazia Bezeli kandi nahaana kisiuviriru ku vwali mu lisangalira Lisavo lia yatangizira vandu va Isiraeli.