Zefaniya 3 - Luganuzi Luswanu Kuli Wanhu Wose 2002

Wuling'anizwe wa Yelusalemi

¹ Woyi hee! Yelusalemi! Hambi nha yokongomezwa. Hambi nha lye 'kaya lyono limemile wibavye. Ne walongola wawo, wo wanhu wabi, wakuwewonela wanhu wawo.

² Lye 'kaya lyono si likumuhulika Muwaha Mulungu, hamba kubocela ze mejizo gakwe. Likali namwitumbila Muwaha Mulungu, hamba kulomba wutazi kuli Muwaha Mulungu.

³ Ne wawaha wayo wabuguci, wehwanile zisimba zono zikukoloma, ne Wahakimu wayo, nawo wehwanile maminzi ge camihe gono gadabuce, gono si gasigazaga hamba cinji, lono wela hakali mitondo.

⁴ Ne wawizi wayo si wehuwilwa, kanyhi wakonji. Wakohani nawo, wahatajila wavu i hanhu hono helile, kanyhi wakulipitula ne lilajilizo lyo Mulungu ku soko ye cambuzi cawo weneco.

⁵ Ninga Muwaha Mulungu, yali mwi'kaya, yakwituma ze ling'ani, si yakwituma zimbi ng'o. Nayo kawaletelaga wanhu wakwe ze ling'ani, nhondo zose. Ninga i wanhu wono wasina ling'ani, vyo wajendeleye du ku wituma zimbi, hamba kuwona cevu yaye.

⁶ Ninga Muwaha Mulungu yakutya, “Nagawusiza lukulu makungugo gose. Nagagwisanga makaya gawo, no kugaleka majinji gawo hamonga ne minala yawo vihodanjice.

⁷ Ne makaya gawo geza gali bwete, na mu zinzila zayo, mweza musina cinji, hasina hamba yunji mono yasigaye. Nane nghehwesa vyono, wanhu wangu wowa wena cogopo kuli'ne no kubocela mejizo gangu, no kuleka kusemwa, mejizo gono nawejiza. Ninga wakacenya musunho, no kwituma zimbi mu mikalile yawo.”

⁸ Ane nghutya, “Wunindilaje.” Vyo yakutya Muwaha Mulungu, “Wulilindile lizuwa lyono nokwinuka ho niwasitace makungugo. Nane nakondya kutemya vyono, nigakonghole i makungugo, hamonga no wutemi wose, ho wasume kuviwona i vilungo vye likuwo lyangu. Ne yinze yose yotakamizwa no moto we likuwo lyangu.

⁹ “Lulo nolowapitula i wanhu we makungugo niwapele nonga swanu, nawo wolohemba nene du nili wene, hamba si woloyihemba kanyhi milungu yinji. Langa wolohulika nene du.

¹⁰ Hamba kuwe kutali ku wulawa mu makolongo ga Kushi, ninga iwanhu wangu wono weyagaye ako na ako, wose wolondavizya vilavywa nene du.

¹¹ Na mwi'pango lilyo, anye nyo wanhu wangu, molowa musina soko yo kuwona cevu, vyono mwali mwambedegala. Hambi 'ne nha nowawusa i wewoni wose, hamonga ne wevuni wose. Nanye lulo, si molombedegalila lukulu kanyhi mwi'tunda lyangu lyono lyelile.

¹² Nane nolowaleka baho i wanhu wenenenyhezi ne waciwa, wono wokuza kulondola wutazi kuli'ne.

¹³ Ne wanhu wa Isilayeli wono wasigaye, si wolokwitendela vibi kanyhi munhu na muyagwe, hamba kwilonjela zo wulambi, hamba kuwa wakonji yaye. Wolowa walugutwe kanyhi wapolile, na holowa hasina yunji mono kolowogofya kanyhi.”

Lwimbo lwe nyemo

¹⁴ Ale, mwimbe ne nyemo kwe mazi mawaha 'nye nyo wanhu wa Isilayeli. Nagwe go Yelusalemi, wusangalale kwe nhumbula yako yose.

¹⁵ Muwaha Mulungu kakondya kuwudumya u wuling'anizwe wako, kanyhi kakondya kuwawusa ne walugu wako wose. U Muwaha Mulungu, u Mutemi wa Isilayeli, yali hamonga nanye. Holeka kusina soko kanyhi yono yoleka muwe no woga.

¹⁶ Cipango cikuza, lono woloyilonjela Yelusalemi wawe kutya, “Ale, wulece kogopa 'gwe go likaya lya Sayuni! Ne miwoko yako yilece kudejepa!”

¹⁷ Muwaha Mulungu wako, yali hamonga nagwe, ne vilungo vyakwe, vyokupela wusume. Muwaha Mulungu, kotuga wendezwe kuli'gwe, na mu wendo wakwe, kokupela wumi. Kokwimbila no kukusangalalila

¹⁸ ne nyemo, yono yinha nyemo ye wanhu wono wali mu sikukuu. Kanyhi Muwaha Mulungu yakutya, “Nakondya kuwuwusa u wogofye wo wongomezwe, naciwusiza lukulu ne cevu cawo.”

¹⁹ Icipango cikuza! Lono nolowalipiciza wono wakumwiwonelenyi, nolowaponya we vilema wose, kanyhi nolowagomola ku zi kwawo wose wono wali wasolwa mu yisi yawo no kutegulwa kutali. Nolopitula ne cevu cawo ciwe lukumyo, ne yinze yose yolowakumya wene.

²⁰ “Icipango cikuza! Lono nolowagomola wanhu wenyu wono weyagazwa, wawuye ku zikaya, nolomunozenyi lukumyo no kumanyika muli yinze yose, no kumunozenyi kanyhi mumoteswe nha vyono ha mwamulizo.” Vyo yakutya Muwaha Mulungu.