Zefaniya 2 - Luganuzi Luswanu Kuli Wanhu Wose 2002

Wulombe so wunene

¹ Anye nyo likungugo lyono lisina cevu, ale mwikongholelaje hamonga,

² lono mukali nawinjilwa kutali, kotya mawaje gono gapemheluswe ne mbeho, na lono likuwo lyo Muwaha Mulungu, lyono lihwanile moto likali si namuzizenyi, lizuwa lyono kololajila wukali wakwe.

³ Mumupitucilaje Muwaha Mulungu anye wose nyo wanhu wenenenyhezi wa mu yisi, anye mono muwukamise wulajilize wakwe. Mwitumaje ze ling'ani, kanyhi mwinenenyheze nyo weneco hali Muwaha Mulungu, nha lunji mopona mwi'zuwa lyono Muwaha Mulungu, yalalajila likuwo lyakwe.

Wongomezwe we makungugo gono gayipilime Isilayeli

⁴ Hasina yunji mono kolosigala mwi'kaya lya Gaza. Na Ashikeloni yolowa wambuce. Ne wanhu wa Ashidodi wolowingwa mu mapango ge misi, ne wanhu wa Ekiloni wolowingwa ku wulawa mwi'kaya lyawo.

⁵ Anye nanye nyo Wafilisiti, woyi hee kuli'nye, anye nyo wanhu mono mwikaye mu mhwani. Hambi Muwaha Mulungu, nha yakondya kudumula nghani muli'nye. Mwene komongomezenyi wose, hamba hasina yunji muli'nye mono kolosigala.

⁶ Yisi yenyu ku wulawa ku mhwani, yolowa migunda yono yili mwazi, yolowa yina vibanda vye wadimi, hamonga ne mabululu ge zingholo.

⁷ Ne wanhu wa Yuda, wono wasigala, woloyisola yisi yenyu. Wolodima zimitugo zawo kuko no kugona mu zikaya za Ashikeloni. U Muwaha Mulungu wawo, kolowa hamonga nawo, na kanyhi kowamotesa.

⁸ Muwaha Mulungu we Mihanga yakutya “Nawahulika wanhu wa Mowabu na Amoni wakuwaliga no kuwezwajiza wanhu wangu, no kwitapa vyono woyisola yisi yawo.

⁹ Ninga mbeka, nha vyono ninha ane no Mulungu mumi, ane no Mulungu wa Isilayeli, nghwilahiza nha vyono, Mowabu na Amoni zolokongomezwa nha vyono Sodoma na Gomola zongomezwa. No mwino wologwa hanhu hose, no kongomezezwa lukulu cibitilila, ne mabalwe go golocindika mumo. Ne wanhu wangu wono wasigaye, woloyipumha, no kuyisola yisi yawo.”

¹⁰ Na vyo wolowa wanhu wa Mowabu na Amoni, wololipicizwa ku soko yo wiwoni wawo, hamonga ne zinyono zawo, na ku soko yo kuwaliga wanhu wo Muwaha Mulungu we Mihanga.

¹¹ U Muwaha Mulungu, kolowogofya muno. Hambi nha koloyimala milungu yose ya mono yinze, ne makungugo gose golomuhemba mweneco du, wanhu na yisi yawo weneco.

¹² Muwaha Mulungu kanyhi, kolowawulaga nhavivyo ne wanhu wa Kushi.

¹³ Kanyhi Muwaha Mulungu, kolokwitumamila vilungo vyakwe yayihodanje Ashuli. Mwene kololinoza likaya lya Ninawi liwe nyika ye 'tongo, kanyhi yiwe nyika yono yisina malenga.

¹⁴ Holowa hanhu hono matewa ge zimitugo, ne mawala gose ge zinimu, wowa wo wikalo wayo. Ne zinhuwi zolokwikala mu matongo gago, akuno zikulila ku ulawilila mu madilisha ge matongo. Ne mahowe nago, golowa kulila ha milango. Ne mabici go muhagata gono wazenjeye, yolowa nghani ya bwete du.

¹⁵ Azi zo zololijelela likaya lyono lina wiwoni wo kwiyitumbila vilungo vyalyo lyeneco, no kwihwesa vyono likaye lipolile. Ne wanhu wayo wakwihwesa vyono likaya lyawo lye 'waha kuciza makaya gose mono yinze yose. Na kumbe wo wambuce wa bwete, hambi nha holopituka hawe wikalo we zinimu za mu mbago! No munhu wo wose mono kokolela baho, kololihoweleza no kusinjisa mutwe wakwe.