Zakaliya 9 - Luganuzi Luswanu Kuli Wanhu Wose 2002

U wuling'anizwe we zinghungugo zono zipilime Yelusalemi

¹ Ayi yo nghani yono yikulawa kuli Muwaha Mulungu. Muwaha Mulungu yakalavya lilajilizo lyo wulipicizwe we yisi ya Hadelaki, ne likaya lya Damesiki. Ninga wulipicizwe wuwo si wowa so zimhuga ze Waisilayeli du, langa hamonga ne likaya lya Siliya, likaya lyo Muwaha Mulungu.

² Na Hamati yono yili behi na Hedelaki, hamonga ne makaya ga Tulo na Sidoni, hamba gawe gena mahala menji.

³ Nayo Tulo, yezenjela magomawakali gono galipilime likaya, no kukonghola fweza nyinji, hamonga na zahabu nyinji, kotya matope ga mu nzila.

⁴ Ninga lanje ta! U Muwaha Mulungu komuwusiza lukulu vivyo vyose. Nayo kolozigumila zi sawo zakwe mwi'lenga, ne likaya nalyo, lyoloticimizizwa lukulu.

⁵ Ne likaya lya Ashikeloni lyoloziwona zizi nalyo lyolokogopa. Nhavivyo ne likaya lya Gaza, lyoloziwona zizi, nalyo lyolowona wusungu wuwaha muno. Nayo Ekiloni hamonga no witumbilo wayo wose, nayo yolobenanjizwa. Nayo Gaza yolowula mutemi, Ashikeloni yololekwa mu wuciwa wuwaha muno.

⁶ Ne wanhu macotala, wolokwikala hamonga ku Ashidodi. Nayo Muwaha Mulungu yakutya, “Nowanyetya wawa i Wafilisiti wewoni.

⁷ Siwoloyilila lukulu kanyhi nyama yono yina ne sakami yayo, hamba kulya ndigwa yo yose yono yili mwiko kuyilya. Nawo wose wono wolosigala, wolojendelela kuwa wanhu wangu, nawo nolowehwaniciza ne mhuga ya mu lulelo lwe nyumba ya Yuda. Nayo Ekiloni yose, wolowa wanhu wangu kotya Wayebusi.

⁸ Nane noyilanjilila yisi yiyi, kanyhi nowika ne wasilikale wono woyidima ho wanji walece kukola mumo. Kanyhi hamba sinowakombola walugu hamonga ne wewonezi, ho wawewonele wanhu wangu. Hambi nha nakondya kuwona vyono, i wanhu wangu wakugazwa muno.”

U mutemi wo mulamu mono cikumulanjilila

⁹ Musecelele, musecelele nye nyo wanhu wa ku Sayuni! Muzoze muno muno so nyemo, anye nyo wanhu a Yelusalemi! Mulanje ta! Mutemi wenyu yakumuzizenyi 'nye! Yakuza yena nyemo mbaha ne mhonelo, kanyhi mupolo, yakuza yali mucanyha ye ndogowe, nyana ye ndogowe.

¹⁰ Muwaha Mulungu yakutya, “Nogawusa ne matuka go wulugu, gono gakulawa ku Isilayeli, niziwuse ne zifwalasi zono zolawa ku Yelusalemi, hamonga no wupinde wono wukwitumamilwa mu wulugu, vyose vyokongomezwa. No mutemi wenyu, koleta mulamu kuli zinghungugo zose. Kanyhi kotema ku wulawilila kwi'lenga sunga ko kwi'lenga na ku wulawilila kwi 'kolongo lya Efulata, sunga ko kundumo ye yisi.”

Kuwagomola kanyhi wanhu wo Mulungu

¹¹ U Muwaha Mulungu yakutya, “Kusoko ye cilagane cangu na nyenye, cono cawikwa mu nzila ye sakami ye makumbiko. Holeka nane nowawopolela wafungwa no kuwawusa mwi'kombo lyono lisina malenga, likombo lyo wuhamywe.

¹² Ale muwuye anye wose nyo wahamywa mono alu mweza mwina witumbilo, muwuye ku wikalo wenyu wono wina mulamu. Alu nghumulonjelenyi vyono, nomupelenyi wulugutwe kali kejete ku soko magaziko genyu.

¹³ Nomwitumamila Yuda yawe kotya wo wupinde wo musilikale, na Isilayeli yawe kotya zo songa. Nowetumamila wanhu wa ku Sayuni wawe kotya wo mumaje, wehome ne wanhu wo Wugiliki.”

¹⁴ Nayo Muwaha ho kokwilajila mu wanhu wakwe koguma zi songa zakwe, nazo zobita kotya limuli. U Muwaha Mulungu yo kotowa ne ndulele. Nayo kojenda ne mbeho ye civulavumbi kuwulawilila ku takama ye yisi.

¹⁵ Kanyhi u Muwaha Mulungu we mihanga yo kowakamisa ne wanhu wakwe, nawo wowongomeza ne walugu wawo. Kanyhi wolowa kuzoza kuko ku wulugu kotya nhe wagalo 'jimbi kanyhi wolopegwa vilungo vyo kuyimwaga sakami ye walugu wawo; sakami yiyo yolohuluma kotya sakami ya ha wukumbicilo, yono yimwajigwe ku wulawa mu bakuli ha cikumbicilo.

¹⁶ Hobaho lizuwa lilyo lilaza kuwa lyafika, u Muwaha Mulungu ho kolowaponya wanhu wakwe, nha vyono umudimi kaponyaga litewa lyakwe, lono lyamanyhilwa ne lilimu. Nawo wolong'alala mu yisi yakwe, kotya nha vibwe vyo wihambo, vya mu mukumbo wo wutemi.

¹⁷ Lanjenyi ta, yisi yiyo yolowa swanu wule? I wahinza ne wazelelo, wolowa kuwiluka wali vilungo, so wuhemba ne divayi vyono vili mumo.