Zakaliya 6 - Luganuzi Luswanu Kuli Wanhu Wose 2002

U wulajiliwe wo munana: Mikokoteni ye zifwalasi

¹ Kanyhi nghenula meso gangu, nghawona magali mane go wulugu gakuza gakulawilila haciligati ye matunda mejete ga shaba.

² Ligali lilongozi lyakwegwaga ne zifwalasi zindunghu, na lye kejete nalyo wakwegwaga ne zifwalasi zinhitu,

³ lye kadatu nalyo ne zifwalasi zinzelu, na lye kane, nalyo ne zifwalasi ze buli.

⁴ Hobaho nane nghamuwuza malayika yu yulya nghatya, “Gwe muwaha, magali gaga gena nhunizoci?”

⁵ Nayo yakamhitula yakatya, “I magali gaga zo mbeho yine za ku wulanga, nazo zizi zikulawa kuli Muwaha Mulungu yinze yi yino yose.”

⁶ Ligali lyono likukwegwa ne zifwalasi zi nhitu, likubita ku lubavu lwe sumuka ku Babiloni, nazo zi nzelu zidomile ku lubavu lwa ku mwezi, nazo ze buli zikubita ku yisi ya ku lubavu lwa kutakama.

⁷ Hobaho zaza kulawila ze liwala lidunghu, zikasaka kubita ako na ako zikayilingule yinze yose. Nayo malayika yakazilonjela yakatya, “Ale, mubite ako na ako, mukayilingule yinze yose!” Nazo zikabita kuyilingula.

⁸ Hobaho malayika yakanyhema, yakanonjela yakatya, “Zifwalasi zono zibitile ku lubavu lwe sumuka, sunga ku Babiloni, zakondya kulipoza likuwo lyo Muwaha Mulungu.”

Lilajilizo lyo kumuvwika Yoshuwa mukumbo

⁹ Baho u Muwaha Mulungu yakanonjela yakatya,

¹⁰ Ale, wusole i vipegwa vyono wokupela awalya wono walawa ku wuhamywe. Helidayi, na Tobiya, na Yedaya. Hanyuma wubite mbela mbela ku kaya ya Yosiya u mwana wa Zefaniya. Ne wanhu wawa wose, wo wakondya kuwuya ku wulawa ku wuhamywe ku Babiloni.

¹¹ Wunoze mukumbo mu wulawa mu fweza ne zahabu, zono wakupelile, wumuvwice mu mutwe u mukohani muwaha Yoshuwa u mwana wa Yehozadaki.

¹² Wumulonjele wutye, u Muwaha Mulungu we mihanga yakutya, “U munhu mono yakucemwa yinhambi yo kocindika baho kanyhi yo kozenga ne nyumba yo Mulungu no kumugomolela Muwaha lilumbo lyakwe.

¹³ U mwene yo kolizenga no kubocela lilumbo lyo mutemi, nayo kuwatema i wanhu wakwe. Nayo mukohani muwaha kolokwima he'goda lyakwe lyo wutemi. Nawo wokwitumana mulimo viswanu kwa mulamu, kanyhi wowa wehulicile.

¹⁴ No mukumbo wuwo, wolowa co cikumbucizo mu Nyumba yo Mulungu, so kuwapela lilumbo Helidayi, na Tobiya, na Yedaya na Yosiya.”

¹⁵ Ne wanhu wono wekaye kutali, wose wolokuza ho mwitaze nawo, ku wuzenga kanyhi Nyumba yo Muwaha Mulungu. Nayo Nyumba kolo yakondya, baho ho molomanya vyono u Muwaha Mulungu we mihanga yo yanhuma kuli 'nye. Na zizi zose zoficilicila, hono anye wose mugavumile no kugatyatya i malajilizo go Muwaha Mulungu, u Mulungu wenyu.