Zakaliya 4 - Luganuzi Luswanu Kuli Wanhu Wose 2002

Wulajilwe we hano: Ciwicilo ce zitala

¹ Malayika yuyulya mono calonganaga nayo yakaza kanyhi yakanyinusa kotya nha nali ngonile.

² Yakambuza yakutya, “Alu wukuwona cici?” Nane nghamupitula nghamutya, “Nghuwona ciwicilo ce ziala cinozwe na zahabu. Kanyhi mucanyha, mo yili bakuli yono yina mafuta, a mu ciwicila ce zitala, mozili tala mupunghati, zono zina vitajililo vye mafuta mu zitala zizo.

³ Kanyhi ho yili ne mizeyituni myejete yili mu mhelo ye ciwicilo ce zitala, muzeyituni monga ku lubavu lumonga no muyagwe nawo ku lubavu luyagwe.”

⁴ Hanyuma nghamuwuza malayika yu yulya nghatya, “Alu i vinhu avi so cici vili baha”

⁵ Yakanyha, “Alu 'gwe siwuyimanyile nhunizo ye vinhu vivi?” Nane nghamutya, “Aa! Ng'o ye, simanyile muwaha.”

Wihuwizo wo Mulungu kuli Zelubabeli

⁶ Malayika yakanonjela nghamutegulile Zelubabeli nghani yono yikulawa kuli Muwaha Mulungu, yono yikutya, “Si kwe vilungo, hamba si ko wusume wako go mweneco, aa, ng'o! Langa ko muhe wangu.

⁷ Yakajendelela kulonga yakutya, ‘Wule, litunda lili lyokwimila? Aa ng'o! Agwe Zelubabeli, kolitenjelemula. Nagwe kokwanza wuzenji wupya we Nyumba yo Mulungu kolo wukulijeleka mwi'jinji libwe lye ndumilizo, wanhu wose wolozoza wakutya, 'ulungu wulilugutize! Mulungu wulilugutize!’ ”

⁸ Kanyhi yinghani yo Muwaha Mulungu yikanyiziza,

⁹ yikutya, “Zelubabeli yakondya kuwika musinji we Nyumba yo Mulungu, na mbeka koyikondeleza yikaya yiyi. Na kolo zizi zakondya kwijela ale, baho wanhu wose ho wokwihuwila vyono yo nene mono nakutegula kuli wene.

¹⁰ Aluno wakukalala lono wakuwona luzengo lukubita luli mhola mhola. Ninga luno wowona vyono zelubabeli yakulujendeleza luzengo lwe Nyumba yo Mulungu, nawo wosangalala muno muno.” Malayika yakamhitula yakatya, “Zitala mupunghati, go meso mupunghati go Muwaha Mulungu gono gakusuma kuyiwona yinze yose.”

¹¹ Hobaho nghamuwuza kanyhi nghatya, “Mibici myejete ye mizeyituni yono yili mu lubavu lwe ciwicilo ce zitala nhunizo yayo co cici.

¹² Kanyhi i nhunizo ye manhambi mejete go mezeyituni gono gali mu lubavu lo kulume no kucekulu lwe vimilo vye zitala vye zahabu hamonga ne vibomba vyono vikutajila mafuta mu zitala?”

¹³ Ale, nayo yakambuza yakatya, “Alu 'gwe siwuzimanyile? Nghamupitula nghamutya, ng'o ye, simanyile 'gwe Muwaha.

¹⁴ Hanyuma ho yakanonjela yakatya, wo wanhu i wejete wono Mulungu yawahagula no kuwetila mafuta ho wamwitumamile Muwaha Mulungu we yinze yose.”