Zakaliya 14 - Luganuzi Luswanu Kuli Wanhu Wose 2002

Yelusalemi ne zinghugugo zinji

¹ Lanjeta! Lizuwa lyono Muwaha Mulungu kolokwikala mwi'goda lyakwe lyo wuling'anizi, nha lili behi. Baho Yelusalemi yolotekwa. Ne mateka wose wologawilwa ha mwande ye meso genyu.

² U Muwaha Mulungu kolozileta zinghungugo zose hamonga, zihome na Yelusalemi. Likaya lyolosolwa, ne zikaya zolotekwa. Ne we cicekulu wolokwibatwa kwa vilungo ne walugu, wagone nawo. Ne nusu ye wanhu wolobita mu mateka ninga wanji wa muli wene, siwolosolwa yaye ho wawuce mwi'kaya.

³ Nayo Muwaha Mulungu ho kololawila yehome ne zinghungugo zizo, nha vyono yawahoma mu vilo vyono vipulute.

⁴ Baho ho kolokwinuka no kwima mwi'tunda lye Mizeyituni ku lubavu lwa kucilima ya Yelusalemi. Baho litunda lye Mizeyituni, ho lyolokwigawa hejete, ku wulawilila kucilima ko ku mwezi. Ne lilolo yiwaha lyolowa hagati yayo. Ne nusu ye litunda, lyolowa likwiwila lidomile ku lubavu lwa kusumuka, ne nusu yayo nayo yolowa kwiwila yidomile lubavu lwa kutakama.

⁵ Nanye molotiza mukolele mwi'lolo lilyo lyono lilitemanuye litunda hejete. Mulamanghaga nha vyono i wasogo zenyu wanozaga, mu vipango vye litulo lyono lyejela, mu vilo vyo mutemi Uziya wa Yuda. U Muwaha Mulungu wangu, mwene kolokuza hamonga ne wamalayia wakwe.

⁶ Vilo vivyo kolo vyaza, kolowa kusina mbeho, hamba mbeho ye cinyuli,

⁷ Hamba wutitu wo wose. Langa kolowa no wuzelu du nhondo zose, sunga na ku cilo kose. No Muwaha Mulungu du yali wene, yo yamanyile lizuwa lyono zilejelela zizi.

⁸ Na mwi'zuwa lilyo, malenga maswanu golohuluma gakulawilila ku Yelusalemi. Nusu yago, golokwinjila mwi'lenga lyo mwino, ne nusu nzagwe ye kejete, golokwinjila mwi'lenga lya Meditelaneya. Lyolohuluma vilo vyose vya mu mwaka wose. Mu vipango vye cifuku ne cibahu.

⁹ Ale baho, u Muwaha Mulungu ho kolowa yo mutemi we yinze yose. Baho wose wolomuhemba mwene vyono yo Mulungu, kanyhi wolomumanya mwene vyono lilyo lyo litagwa lyakwe.

¹⁰ Ne yisi yose, ku wulawilila Geba lubavu lwe sumuka, sunga ko ku lubavu lwe takama ku Limoni, yolotelemezwa ho yiwe ya wuhihi. Nayo Yelusalemi, yolozengwa mu cizuli ce yisi yono yipilime. Ne likaya lyololawilila kwi 'lango lya Benyamini, sunga ko kwi'lango lya kumhelo, hono hali ho wuli mulango mulongozi. Na ku wulawilila ha munala wa Hananeli, sunga kono kogali makobonjelo ge zizabibu go mutemi.

¹¹ Ne wanhu wolokwikala baho wapolile, kolowa kusina wogofywe, hamba wongomezwe yaye.

¹² U Muwaha Mulungu kololeta nhamwa 'mbi yo kogofya mu zinghungugo zose zono zoloyihoma Yelusalemi. Ne nyama ye miwili yawo, yolowola lono wakali womi, ne meso gawo hamonga ne zinimi zawo, navyo vyolowola.

¹³ Mu vilo vivyo, u Muwaha Mulungu kolowewajiza wose mahala gawo, no kuwamemya woga mu zinhumbula zawo, ho wasume kwiyihoma weneco wose munhu no munhu muyagwe mono yali behi nayo.

¹⁴ Nawo i wanhu wa Yuda, wolokwinjila mumo mu wulugu wakuyitaziza Yelusalemi. Kanyhi woloziteka ne zisawo ze zinghungugo zinji, zahabu, fweza, ne myenda hamonga ne vinhu vinji muno.

¹⁵ Kanyhi litamwa na yibi lyolozigwila fwalasi, ne zingamiya, ne zinyumbu ne zindogowe, sunga na mu mitugo yose yowa yili mu zinghambi ze walugu.

¹⁶ Hobaho wose wono wasigaye wa mu zinghungugo zono zayihomaga Yelusalemi, zolowa kubita mwaka kwa mwaka kumuhemba Muwaha Mulungu we mihanga u mutemi, no kusangalalila sikukuu ye vibanda.

¹⁷ Na hono nghungugo yiyi yileme kubita kumuhemba Muwaha Mulungu we Mihanga u mutemi, ale ne mvula nayo siyotonya mu yisi yawo.

¹⁸ Nawo wa Mumisili, hono waleme kubita kusangalalila sikukuu ye vibanda, ale, nawo wokwibatwa ne litamwa lilyo libi, lyono Muwaha Mulungu kowaletela zinghungugo zose zono zolema kubita kumuhemba.

¹⁹ Awu wowa wo wulipicizwe wono woyigwila Misili, hamonga ne zinghungugo zinji zono zi zobita kuyisangalalila sikukuu yiyo ye vibanda.

²⁰ Kanyhi hamba nhavivyo, na mwi'zuwa lilyo sunga ne madodolo ge zifwalasi golokwandikwa zinghani azi, “Welile kuli Muwaha” ne vyungu zose zo kutelecela mu Nyumba yo Mulungu, zowa zezigwe nhe zibakuli zono zili ha cikumbicilo.

²¹ Ne zinyungu zose zo kutelecela za mu Yelusalemi, na za mu Yuda yose, zolowa zasiwanulwa, ho zitumamilwe mu wuhembi wo Muwaha Mulungu we Mihanga. Ne wanhu wono wowa kulavya makumbiko gawo, wozitumamila so wutelecela zinyama zawo ze makumbiko. Ne lizuwa lilyo kolo lyafika, kolowa kusina kanyhi musuluza mu Nyumba yo Muwaha Mulungu we Mihanga.