Zakaliya 13 - Luganuzi Luswanu Kuli Wanhu Wose 2002

¹ “Muwaha Mulungu we Mihanga yakutya, vilo vivyo kolo vyafika, mumvilo wolodigulwa, wuweze wanhu we ndelo ya Dawudi, ne wanhu wa ha Yelusalemi, u wubi wawo hamonga no wuhemba milungu yinji.

² Kanyhi mu vilo vivyo, nolowusa ne matagwa ge milungu ye vihwani yono yili mu yisi, na holowa hasina yunji wo wose mono kolosuma kujikumbucila kanyhi. Nolowawinga wose wono wakwinoza wawizi wo wulambi, no kuwawusiza wuhile wuwo i wahemba vihwani.

³ No munhu wo wose mono kolojendelela kulavya wuwizi ale, u sogwe no nyina, wolomulonjela vyono yanojeye yawulagwe. Hambi nha yakwinoza vyono yakulonga zinghani zo Muwaha Mulungu, kumbe ho yakulonga zo wulambi du. Holeka lono yakuwila, u sogwe no nyina womuwulaga.

⁴ Ne vilo vivyo kolo vikuza, holowa hasina muwizi wo wose mono kolokwidunhumulila zo wugubulilwe wakwe hamba kwituma zo wuwizi, hamba kuvwala i kanzo ye ciwizi-wizi, ho yawakonje wanhu.

⁵ Langa mwene kolotya, ‘Ane si nili muwizi yaye, ane mulimo wangu kulima du, wo mulimo wangu wulawa wudodo wangu.’

⁶ Na lono yunji yamuwuze yatye, ‘Alu zinghomele zizo zono zili mu mhambaga yako, wawa cici?’ Nayo komupitula yatye, ‘Nazituga mu nyumba yo mwiyendi muyangu.’ ”

I lilajilizo lyo kumuwulaga u mudimi wo Mulungu

⁷ U Muwaha Mulungu we mihanga yakutya, “Winuce 'gwe go mumaje, wumuhungucile mudimi wangu, mono yakunyitumamila. Wumuwulagaje, ne zingholo zokwiyagala, Nane nowatowanga wanhu wangu.

⁸ Na mu yisi yiyi yose mafungu mejete ge wanhu wofwa.

⁹ Nane ho nowalanga wa walya we lifungu lye kadatu wono wasigaye, nane noweza nha fweza yono yezigwe no moto kanyhi nowajela nha vyono zahabu yikuwa kujelwa. Hobaho wonyhema, nane nowapitula, ‘Nane nowalonjela vyono wene wo wanhu wangu, awo wovumila vyono ane yo nene Mulungu wawo.’ ”