Zabuli 97 - Luganuzi Luswanu Kuli Wanhu Wose 2002

Mulungu yo mutemi we lilumbo

¹ Muwaha Mulungu yo yatemile! Yinze yisangalale, nanye, mo vizingwa sangalalenyi!

² Mavunde ne citi ciwaha vimupilime, nayo, yatemile ko wuswanu ne mbeka.

³ No moto wumulongoleye ku mwande yakwe, wukuwaticimiza i walugu wakwe mbavu zose.

⁴ Ne mamuli gakwe gakuyimulicila yinze, nayo yinze yikugawona yiwa kucicima.

⁵ Nago matunda gakwenjeduka kotya yihula, ha mwande yo Muwaha Mulungu. Heya, ha mwande yo Muwaha we yinze yose.

⁶ Wulanga wukwanza ze ling'ani yakwe, ne makungugo gose gakuluwona lukumyo lwakwe.

⁷ Na wose wono wakuhemba vihwani, wakukozwa cevu, heya, sunga na wose wono wakwikumizya milungu, yono yisina cambuzi, milungu yose nha yimuhembaga Muwaha Mulungu du.

⁸ Wanhu wa ku Sayuni waseceleye, ne makaya gose ga Yuda nago gakusangalala, ku soko yo wuling'anizi wako go Muwaha Mulungu.

⁹ Hambi 'gwe go Muwaha Mulungu Mono wulawiliciye nha wutemile mu yinze yose, kanyhi yo gwegwe du, mono wuli vilungo muno muno wucizize milungu yose.

¹⁰ U Muwaha Mulungu, yawendile wono wawusulile wubi, kanyhi mwene kawudimaga wumi wa wehuwilwa wakwe, no kuwaponya mu vilungo vye wanhu wabi.

¹¹ No wuzelu, wumumulicilaga munhu, we ling'ani ne nyemo nayo, kuli wanhu waswanu.

¹² Nanye mo we ling'ani, muzisangalalilaje zono Muwaha Mulungu yetuma! Mukumbucile zo lukumyo lwakwe, mumulumbe!