Zabuli 96 - Luganuzi Luswanu Kuli Wanhu Wose 2002

Mulungu yo mutemi we lilumbo

¹ Mumwimbile Muwaha Mulungu lwimbo lupya! Mwimbilenyi Muwaha Mulungu mo we yinze wose!

² Mumwimbile Muwaha Mulungu, no kulikumya litagwa lyakwe. Mwanze nhondo zose ze nghani yakwe swanu, vyono mwene yo mhonelo yetu.

³ Mugalonjele makungugo zo lukumyo lwakwe, hamonga na ze metumo gakwe, mawaha kuli wanhu wose.

⁴ Hambi u Muwaha Mulungu, nha yo yalawiliciye nayo, yo yakukumywa muno muno, kanyhi yo yanojeye kogopwa muno, kuciza milungu yose.

⁵ Milungu ye makungugo ganji si cinji yaye, ninga Muwaha Mulungu yo yawumba wulanga.

⁶ Lilumbo no wuwaha vimupilime vilungo no wuswanu, vimemile mu Nyumba yakwe.

⁷ Mumupelaje cogopo Muwaha Mulungu, anye wose we zimhuga zose ze wanhu, mupelenyi Muwaha Mulungu lukumyo no wuwaha wakwe.

⁸ Likumyenyi litagwa lyo Muwaha Mulungu, mulete cilavywa co kwinjilila mu Nyumba yakwe.

⁹ Mumuhembe Muwaha Mulungu lono yakwilajila, wucicime hali mwene, 'gwe go yinze yose!

¹⁰ Mugalonjele makungugo mutye nhavi, “Muwaha Mulungu yo Mutemi! Yayisimya yinze hanhu hayo, hamba si yosinjisicila lukulu yaye. Nayo kowaling'aniziza wanhu mu ling'ani.”

¹¹ Sangalalenyi anye mo wulanga ne yinze! Nalyo lilenga litowe cihumbi, hamonga na vyose vyono vili mumo!

¹² Nanye mo migunda musangalale, hamonga na vyose vyono vili mumo! Holeka sunga ne mibici yose ya mu mbago, nayo yimbe ko wusangalale!

¹³ Nayo Muwaha Mulungu kokuza no kuyitema yinze. Heya, mwene kowatema wanhu, mu ling'ani hamonga no wiling'ano.