Zabuli 94 - Luganuzi Luswanu Kuli Wanhu Wose 2002

Mulungu yo muling'anizi wa wose

¹ Gwe go Muwaha Mulungu, go Mulungu mulipicizi, ale, wulajile likuwo lyako!

² Ale, winukaje wime wima agwe, go muling'anizi we wanhu wose, wuwalipicize wose, i wedunhumuzi wono wasina cihuliko, nha vyono yiwanojeye!

³ Gwe go Muwaha Mulungu alu i wabi, wojendelela kwikumya sunga nili lo? Alu wajendelele kwiyikumya sunga nili?

⁴ Alu i wabi wojendelela kwikumya so wubi? Hamba wokwidunhumula no kwikumya sunga nili?

⁵ Wakuwongomeza wanhu wako 'gwe go Muwaha Mulungu, no kuwewonela wawo wono yo sawo yako.

⁶ Wakuwawulaga i wacekulu wafwile, hamonga ne wajenzi, wakuwawulaga ne wana wono wasina walezi!

⁷ Wakutya ti, “Muwaha Mulungu si yakuwona yaye, u Mulungu wa Yakobo siyamanyile yaye!”

⁸ Anye mo walele, mwihwesaje ta hadodo! Anye nanye mono musina mahala, alu ho motuga nili wizuce?

⁹ Alu mukwihwesa mono yalinoza likutu, hongo si kosuma kuhulika yaye? Hamba mono yaliwumba liso, alu hongo si kosuma kuwona ng'o?

¹⁰ Mono yagatemile makungugo, alu hongo si kosuma kulipiciza? Hamba mono kafundaga wanhu, wukwihwesa yasina wizuce lo?

¹¹ U Muwaha Mulungu, yagamanyile mahweso ge wanhu, yamanyile vyono si gakwiliye hamba nhavi bwete.

¹² Gwe go Muwaha Mulungu, yo mumoti munhu mono kumufundaga cogopo, munhu mono kumwijizaga wulajilize wako.

¹³ Hambi nha komuceheza mu vilo vyo wugaye, ninga i wanhu wabi wakuhimbilwa yikweme.

¹⁴ Muwaha Mulungu, si kowalecela lukulu wanhu wakwe, hamba si kowasemwa yaye wono yo sawo yakwe.

¹⁵ Holeka sunga ne ning'aniza, yowa ye ling'ani, nawo we ling'ani woyityatya.

¹⁶ Hamba nani 'mbi mono yema, ho yanhaze kuli wetuma zimbi? Hamba nani mono yema ku lubavu lwangu, yanhaze kuli wetuma zo wubi?

¹⁷ Na hono Muwaha Mulungu yali yalece kunhaza, mhali nakondya kubita ku yisi ye wafu.

¹⁸ Nali neza kutya, “Neza kugwa,” lusungu lwako 'gwe go Muwaha Mulungu, lukasimya'ne wima.

¹⁹ No wuhangawe wa mu nhumbula yangu, lono wukucila, agwe kunhuzaga kanyhi kusangalazaga.

²⁰ Agwe si kokwilumbaniza ne mahakimu, wono si watyatyaga ze ling'ani, wono wawuwikaga wulajilize mu nzila, yo kuwutetela wubi.

²¹ Wene wawo welumbanizizaga mu zinzila, zo kuwongomezeza wanhu we ling'ani, no kuwaling'aniza wufwe, wanhu wono wasina wusutye.

²² Ninga u Muwaha Mulungu wangu, yo kanyhitilaga muli zose, kanyhi wo wihundiko wangu.

²³ Nayo kowagomolezeza weneco wubi wawo, kanyhi kowapatila lukulu ku soko yo wubi wawo. Heya, Muwaha Mulungu, u Mulungu wetu, kowongomeza!