Zabuli 92 - Luganuzi Luswanu Kuli Wanhu Wose 2002

Lwimbo lwo kumukumya Mulungu

¹ Yo nghani swanu muno kukulumba agwe, go Muwaha Mulungu, kwimba so cogopo cako, 'gwe go Mulungu Mono Wulawiliciye.

² Yo nghani swanu kwanza zo lusungu lwako, hakali mitondo, no wihuwilwa wako vilo vyose,

³ kuzanza ko wutowa masumbi, hamonga no mulizo we ndonondo.

⁴ Gwe go Muwaha Mulungu, i metumo gako mawaha, nha gakusangalaza muno, nane nokwimba na nyemo mbaha, ku soko ye metumo gako.

⁵ Hambi metumo gako nha mawaha muno muno 'gwe go Muwaha Mulungu! Sunga ne mahweso gako, nha ga mahala menji muno muno!

⁶ U munhu mulele, hamba si kosuma kwizuka, nayo muwula mahala, hamba si kosuma kuyimanya nghani yiyi yaye,

⁷ nha vyono nawo i wabi, wosuma kuwiluka nhe mahanze, nawo wono wetumaga zo wubi, vyono wosuma kumoteswa, ninga hamba yiwe nhavivyo, ndumilizo yawo wawo wose, yowa wongomele we cibitilila,

⁸ Nagwe go Muwaha Mulungu, yo gwegwe du Mono Wulawiliciye cibitilila.

⁹ Wawo i walugu wako go Muwaha Mulungu, heya i walugu wako wose mbeka wokongomezwa, na wose wono wetumaga zo wubi, wokwiyagala!

¹⁰ Agwe kumhela vilungo vinji, vinha vilungo vye mbogo, kunjidila mafuta go wusangalale.

¹¹ Nane niwawona nene no mweneco, i walugu wangu vyono wakondya kusumwa, hulika ne cililo cawo i wetuma zimbi.

¹² We ling'ani langa, awo wakuwa kumoteswa nho mutende, kanyhi wawilukaga wawa, nho muhagata wa ku Lebanoni.

¹³ Wakuwa nhe mibici yono mihadikwe, mu nyumba yo Muwaha Mulungu, yikumota mu Nyumba yo Mulungu wetu.

¹⁴ Hamba wawe wakombipe, ninga wojendelela kulela mana sunga ku wukombi, womema moso, nawo wodedewala, no kuwa ne vilungo ho wasume kulwanza u wiling'ano, lo Muwaha Mulungu,

¹⁵ na vyono kanyhi, musina wubi wo wose kuli mwene, mono wo wihundiko wangu.