Zabuli 91 - Luganuzi Luswanu Kuli Wanhu Wose 2002

U Mulungu yo Mudimi wetu

¹ Hono wuwe wuli mu wudimi wo Mulungu, Mono Yalawiliciye, na hono wiwicile lukulu muli mwene, mono yali vilungo,

² kosuma kumulonjela Muwaha Mulungu wutye, “Agwe yo gwegwe go wutizizo wangu, kanyhi go wihundiko wangu, go Mulungu wangu, mono nghwitumbiye!”

³ Mbeka u Mulungu kokuponya mu mutego, kanyhi kokucitila na muli matamwa mabi.

⁴ Mwene kokuhundiciza ne mabawa gakwe, nagwe kodimwa no mwene viswanu, no muwoko wakwe wokudima no kukucitila.

⁵ Nagwe kowa kanyhi wusina soko yo kogopa, wogofye wo wose ku cilo, hamba lunji wuhungucilwe we nhinicizo ku misi.

⁶ Wusina soko yo kogopa lihuhuji, lyono lidahile kwijela nhinicizo ne cilo, hamba mabi ge liwala lyolyose lilya, gono gadahile kukuziza mu madaha ge misi.

⁷ Hamba wawe wanhu elufu monga, wono wafwiye wagwe behi nagwe, hamba lunji wanhu elufu yikumi, wagwe hali'gwe mbavu zose, agwe hamba si kotamiswa yaye.

⁸ Nagwe kowawona ne meso gako gwegwe go mweneco, i wanhu wabi vyono wakulipicizwa.

⁹ Agwe kumunoza Muwaha Mulungu wutizizo wako, kanyhi kumusaka Mulungu Mono Yalawiliciye yawe, wo witumbilo wako.

¹⁰ Holeka nghani yo yose 'mbi, si yokwagana yaye, hamba nghani yo yose ye mawulaji, siyosejelela ha kaya yako.

¹¹ Hambi Mulungu, nha kowalajiliza wamalayika wakwe, wakudime hanhu ho hose hono kowa kubita.

¹² Nawo wokudinghulila mu miwoko yawo, ho wulece hamba kwikobala mwi'bwe.

¹³ Nagwe kogakanyanjila masimba ne mazoka, kozitijinha zinyana ze masimba ne mazoka.

¹⁴ Mulungu yakutya, “Ane nomuponya mono yanyendile. Kanyhi nomudima mono yakumanya vyono nili Mulungu.

¹⁵ Nane nomupitula lono yakunyhemeleza, na lono yali mu wugaye, ane nowa nili hamonga nayo. Nomuponya no kumupela cogopo.

¹⁶ Nomupela vilo vinji vyo wikale wakwe mono'nze, kanyhi nomuponya.”