Zabuli 9 - Luganuzi Luswanu Kuli Wanhu Wose 2002

Lilumbo kuli Mulungu so ling'ani yakwe

(Kuli mwimbizi: Nho wimbe wa Muti-labeni Zabuli ya Dawudi)

¹ Gwe Mulungu go Muwaha wetu, ane nokukumya gwegwe ko mutima wangu wose, kanyhi nokwanza ze metumo gako go wizine.

² Nane nosecelela no kusangalala ku soko yako, nokwimba zo lukumyo lwako, 'gwe go Muwaha Mulungu Mono Wulawiliciye Muli Vyose.

³ I walugu wangu mwali mweza kwidoma nawo, wakawuya ne nyuma, wakagwa, no kwajililila lukulu.

⁴ Kunhetela no kumhela ling'ani yangu, wikaye mwigoda lyako lyo wutemi, wukuling'aniza kwe ling'ani,

⁵ Nagwe kuwatacila we makungugo, kuwongomeza i wanhu wabi, kuwapatila lukulu litagwa lyawo cibitilila.

⁶ I walugu wongomela, wajililila lukulu. Nagwe kugamwagula ne makaya gawo, nawo wakondya kusemelwa lukulu.

⁷ Ninga Muwaha Mulungu yatemile cibitilila, yaliwicile ligoda lyakwe lyo wutemi, ho yasume kuling'aniza.

⁸ Nayo yakuyiling'aniza yinze kwe ling'ani, kanyhi yakugaling'aniza makungugo mu wulunji.

⁹ Muwaha Mulungu, wo wutizizo kuli munhu, mono yakwiwonelwa, kanyhi ho hanhu hono hapolile, mu vilo vyo wugaye.

¹⁰ Nawo wose wono walivumilaga litagwa lyako, 'gwe go Muwaha Mulungu wawo wo wakwitumbilaga gwegwe, hambi 'gwe nha si kumutagaga yaye, u munhu wo wose mono yakukulondola gwegwe.

¹¹ U Muwaha Mulungu yo yayitemile Sayuni, holeka mumwimbilaje nyimbo ze lilumbo, kanyhi muwanzizaje wanhu wose ze metumo gakwe.

¹² U Mulungu kawakumbucilaga wose wono wakugazwa, kanyhi hamba si kacisemwaga cililo ca wono wakwiwonelwa.

¹³ Wumbonele lusungu 'gwe go Muwaha Mulungu! Lanje ta wugaye wono nghugazwa na wono wasulile, wumbuse mu wulawa mu vilungo vye lifwa, 'gwe go Muwaha Mulungu.

¹⁴ Ho simulile zo lukumyo lwako, hali wanhu wa Yelusalemi, kanyhi ho sangalale vyono wakondya kumhonya.

¹⁵ I wanhu we makungugo wahimba likombo, ninga kanyhi wagwila weneco mumo, wegwiza mu mutego wono wawutejile weneco.

¹⁶ U Muwaha Mulungu kelajila mu ning'aniza yakwe ye ling'ani, Ne wanhu wabi wegwiza weneco mu metumo gawo mabi.

¹⁷ I wabi wose wobita ku yisi ye wafu, heya, wanhu wose wono wakumubeza Mulungu.

¹⁸ Langa u munhu muciwa, hamba si kosemwelwa lukulu, u witumbilo wo muciwa, hamba si wokwajililila lukulu.

¹⁹ Ale, wuze, 'gwe go Muwaha Mulungu! Wulece kumuleceleza munhu ho yewone nha yasuma. Wugakongholezezaje makungugo hali gwegwe, wugaling'anize.

²⁰ Gwe go Muwaha Mulungu wuwogofyaje makungugo, ho wamanye vyono wene, wanhu du.