Zabuli 88 - Luganuzi Luswanu Kuli Wanhu Wose 2002

Kulomba wutazi

¹ Gwe go Muwaha Mulungu, go mhonelo yangu, ane nikalaga du nghulila misi yose, na ku cilo, nghuzizaga gwegwe.

² Nghunena wulombe wangu wukuficile, wuhulice ne cililo cangu, wunhaze,

³ Magayo menji gono gakondya kunyagana, sunga neza nili behi no kufwa.

⁴ Ne vilungo vyangu vyose vyakondya kumalika, nehwana na wose wono wakubita kwi'fwa.

⁵ Nakondya kulekwa muli wono wafwiye, nehwana, na wono wawulagwe, wono wali mu vitenjelo, wono agwe si kuwakumbucilaga kanyhi, wono wali kutali no wudimi wako.

⁶ Wanhaga mu cisolo ce citenjelo, mono mowuli wutitu, ne cisolo citali.

⁷ Likuwo lyako limvunile muno muno, nagwe wunhyatiliye ne mawingo gayo.

⁸ Wanhemanula ne wendece wangu, kunoza niwa nha cinhu cavu hali wene. Alu mbopigwe, hamba si nosuma kwiwopolela.

⁹ Sunga ne meso gangu gatunduwaye, ku soko yo wukalale. Nane nghukulilila nhondo zose, 'gwe go Muwaha Mulungu, akuno nghukwalila ne maganza gangu.

¹⁰ Wule, kosuma 'mbi kuwanozeza mapoto wono wafwa? Ma, wono wafwiye wosuma kwinuka, ho wakukumye?

¹¹ No lusungu lwako 'mbi lotambulwa mu citenjelo? Hamba ne mbeka yako ma, hambi yotambulwa kono kowali wafu?

¹² Ma, i mapoto gako, gowa gamanyice 'mbi mumo mu wutitu? Hamba wuswanu wako nawo, wowa wumanyice kuli wawo wono agwe wawasemwa?

¹³ Ninga ane nghulililaga agwe go Muwaha Mulungu, nane nghuletelaga wulombe wangu, hakali mitondo nhondo zose.

¹⁴ Alu so cici wukunhaga, 'gwe go Muwaha Mulungu wangu, alo socici wukundeka?

¹⁵ Hambi ku wulawa wudodo wangu nha ngazagwa, mbikanizizwe kufwa, sunga nalu natimba so wugazwe wo wulipicize wako.

¹⁶ Likuwo lyako likali, alu lyanyagana no wutowe wo wogofye wako, alu wukunyongomeza.

¹⁷ Vyanhejela nha malenga misi yose, vimhilime vyose hamonga.

¹⁸ Kunhemanula ne wendece wangu, sunga ne wayangu wose, alu'ne nekala mu citi du, sina yunji kanyhi.