Zabuli 86 - Luganuzi Luswanu Kuli Wanhu Wose 2002

Kulomba wutazi

¹ Gwe go Muwaha Mulungu, wuteje likutu lyako wuhulicize, hambi ne nha sina cinji, kanyhi nili musocele.

² Holeka wumhonyaje mwi'fwa, hambi 'ne nha nghogopile gwegwe. Wumhonye ane no mwitumami wako, mono nghwitumbiye.

³ Agwe yo gwegwe go Mulungu wangu, holeka wumbonele lusungu, ane nghukulilila misi yose.

⁴ Gwe go Muwaha Mulungu, wusangalaze ane no mwitumami wako, hambi wulombe wangu nha wuli kwako du gwegwe.

⁵ Hambi agwe go Muwaha Mulungu, nha wuli muswanu, kanyhi wuli munenezi nhondo zose, kanyhi wuli lusungu kuli wose wono wakukulomba.

⁶ Gwe go Muwaha Mulungu wuhulice wulombe wangu, kanyhi wuhulice ne cililo co wulombe wangu.

⁷ Nane nghucemelezaga mu vilo vyo wugaye, hambi 'gwe nha kuhulicizaga.

⁸ Gwe Muwaha Mulungu, hasina mulungu mono yehwanile gwegwe, hamba hasina mono kosuma kuzinoza, zono agwe kuzinozaga.

⁹ I makungugo gose gono wagawumba, gokuza no kukuhemba gwegwe, 'gwe go Muwaha Mulungu, nago gokwanza zo wuwaha we litagwa lyako.

¹⁰ Hambi nha yo gwegwe mukala wuwaha, mono kunozaga mapoto mawaha, agwe yo gwegwe Mulungu we ciwene.

¹¹ Gwe go Muwaha Mulungu, wunyijize ze nzila yako, nane noyityatya ko wihuwilwa, wuyitongaje nhumbula yangu yikogope gwegwe.

¹² Nane nokulumba kwe nhumbula yangu yose 'gwe, go Muwaha Mulungu, go Mulungu wangu, nane nokwanza zo wuwaha we litagwa lyako cibitilila.

¹³ Hambi lusungu lwako kuli'ne nha lwinji muno! Nagwe kumhonya nhumbula yangu mu citenjelo.

¹⁴ Gwe go Mulungu, wanhu wedunhumuzi wose wamhinjiye nene, lipuga lye wanhu wawulaji, wono si wakogopile gwegwe wakusaka wambulaje.

¹⁵ Ninga agwe go Muwaha Mulungu, wuli Mulungu wo lusungu, kanyhi wina lihewa, agwe wuli mukangalizi muno, kanyhi wumemile lusungu ne mbeka.

¹⁶ Wumhitucile kanyhi wumbonele lusungu, wumhele vilungo vyako wumhonye, hambi ane nha nghwitumamilaga, nha vyono yaya yanozaga.

¹⁷ Wundajile citanjilo co wuswanu wako, 'gwe go Muwaha Mulungu, awalya wono wasulile, kolo weza kuwona vyono wakondya kunhaza, no kusindamika, wene ho wapuwe.