Zabuli 85 - Luganuzi Luswanu Kuli Wanhu Wose 2002Kulilombela likungugo wumoteswe 1 Gwe go Muwaha Mulungu, kwendezwa ne yisi yako, kuwamotya kanyhi Isilayeli. 2 Kuwanenela wanhu wako wubi wawo, wawusemwa wubi wawo wose. 3 Kuwimila wukali wako wose, hamba si wukuwakolelwa likuwo kanyhi. 4 Wucigomole, 'gwe go Mulungu, go Mukombozi wetu, wulece kuciwonela likuwo kanyhi. 5 Alu 'mbi kojendelela kucisimbila cibitilila? Alu mwene, wukali wako, wojendelela sunga ku zindelo zose lo? 6 Alu hongo, si kocipela kanyhi mikalile mipya, i wanhu wako ho wakusangalalile? 7 Gwe go Muwaha Mulungu, wucilajile wuswanu wako, wucipele ne mhonelo yako. 8 Nghuhulika zono yakutya Mulungu, u Muwaha Mulungu, yakwihuwiza kuwapela mulamu wanhu wakwe wehuwilwa, hono walece kuwuwuyila kanyhi wulele wawo. 9 Mbeka, mwene yewikanize kuwaponya wose, wono wamogopile, no lukumyo lwakwe, lokwikala mu yisi yetu. 10 Lusungu lwakwe ne mbeka yakwe vyokwitang'anila, nayo ling'ani no mulamu vyokwikumbatila. 11 I mbeka yocindika mono yisi, iling'ani nayo, yotima kulawa ku wulanga. 12 Nayo Muwaha Mulungu, kociletela wumoteswe, ne yisi yetu yocitujila ndigwa nyinji. 13 I ling'ani nayo yolongolela hali Muwaha Mulungu, no kumunozelezeza nzila yakwe. |
Cigogo Bible © Bible Society of Tanzania, 2002.
Bible Society of Tanzania