Zabuli 83 - Luganuzi Luswanu Kuli Wanhu Wose 2002

Wulombe ku soko ye walugu wa Isilayeli

¹ Gwe go Mulungu, wulece kunyamala, wulece kutula, hamba kunyamala twii 'gwe go Mulungu!

² Lanje ta walugu wako vyono wasagahaye, na vyono wakukubeza wono wakusulile.

³ Wakuhila wawasepe wanhu wako no kuwatamisa, wakusaka wawatendele vibi wawo wono kuwadimaga.

⁴ Wakutya nhavi, “Alenyi muze cilyongomezeze lukulu likungugo lyawo, ne litagwa lya Isilayeli lyajililile lukulu.”

⁵ Nawo welumbanizize kumonga welunze ho walewane nagwe,

⁶ wanya Edomu, ne Waisimayeli, Wamowabi, ne wanhu wa Hagali,

⁷ wanya Gebali, Amoni na Amaleki, ne wanhu wa Filisiti, sunga ne wekala ku Tulo wose.

⁸ Sunga ne Ashuli nayo yelunza nawo, wakuwataza wana wa Loti!

⁹ Wuwanozeze nha vyono wawanozeza wanhu wa Midiyani. Nha vyono wawanozeza wa Sisela, na Yabini he kolongo lya Kishoni,

¹⁰ wono wawongomeza ku Endoli, sunga ne miwili yawo yikawa mboleya ya yisi.

¹¹ Wuwanozeze wawaha wawo, nha vyono wawanozeza wa Olebu na Zebu, ne watemi wawo wose, wawe nha Zeba na Zalumuna,

¹² wono watya, “Cokwisolela sese yisi yo Mulungu.”

¹³ Gwe go Mulungu wangu, wuwanoze wawe nha manghundi, wawe nhe mahanze gono gakupemheluswa ne mbeho,

¹⁴ nha vyono moto wuticimizaga mbago, nha vyono malambi-lambi go moto, gatakamizaga matunda.

¹⁵ Wuwawingaje wawo kwe cihumbi cako, wuwogofye ne libeho lyako liwaha lyo mukukunzo,

¹⁶ Gwe go Muwaha Mulungu, wuwanozaje wawone cevu ciwaha, ho wawulondole wuwaha wako.

¹⁷ Wawone cevu no kugazika cibitilila, wakozwe soni no kwajililila lukulu.

¹⁸ Ho wamanye vyono yo gwegwe du wuli wene, go Muwaha Mulungu, Mulungu Mono Wulawiliciye mu yinze yose.