Zabuli 80 - Luganuzi Luswanu Kuli Wanhu Wose 2002

Wulombe wo kuligomola likungugo

¹ Wucihulicize 'gwe go mudimi wa Isilayeli, mono kuwatongaga wana wa Yusufu, nhe zingholo. Agwe mono wikaye mwi'goda lyako lyo wuwaha, mucanyha ye makelubi,

² Wuwamulicilaje ku mwande wa Efulayimu, Benyamini, na Manase. Wulajile vilungo vyako, wuze wuciponye!

³ Gwe go Mulungu, cikukunena wucilanje ko wuswanu wako, nase coponywa.

⁴ Gwe go Muwaha Mulungu, go Mulungu we mihanga, alo kojendelela sunga nili kuwusimbila, wulombe we wanhu wako?

⁵ Alu wawunoza wukalale waweza yo ndigwa yetu, kanyhi wacing'wesa mahozi ko winji muno.

⁶ Wagaleceleza makungugo gono gacipilime, geza kuyihoma yisi yetu, ne walugu wetu wakucitovulanga.

⁷ Gwe go Mulungu we mihanga, wucilanje ko lusungu lwako, nase coponywa.

⁸ Waleta muzabibu wu monga ku wulawa Misili, nagwe wukawawinga wanhu we makungugo ganji, hanyuma yayo, wukawuhadika mu yisi yawo.

⁹ Wawuzuwila ho wuwiluce viswanu, nawo wukota milela no kutandala mu yisi yose.

¹⁰ Wagagubika matunda no mubeho wayo, ne manhambi gayo gakawa nha mihagata miwaha.

¹¹ Ne manhambi gayo, gakatandala sunga ko kwi'lenga lya Meditelaneya, ne mahapilwa gayo, nago, gakatandala gakafika ku nhumbi, ye likolongo lya Efulata.

¹² Alu socici, wukagakumula majinji, gono gali gawupilime? Alu yeza wo wose mono yakupuluta mu nzila yiyo, yahepe zabibu zayo,

¹³ sunga ne zingubi za mu mbago, nazo zawa kuwuhodanga, ne vilimu vya mu mbago navyo, vyeza kuwulya.

¹⁴ Holeka go Mulungu we mihanga, cikukunena wucilanje kanyhi! Wucilanje ku wulawa ku wulanga, wuze wuwudime wuwuno muzabibu!

¹⁵ Wono wawuhadika ko muwoko wako wo kulume, na cico cinhambi cidodo, cono wacinozeza vilungo.

¹⁶ Na wawo walugu wetu, wono wawudumulanga, no kuwuticimiza mu moto, wuwalangaje ko wukali, no kuwongomezeza lukulu.

¹⁷ Muwoko wako wumucitile no kumudima munhu wako, mono wamuhagula, ho yawe yakamile ku soko yako.

¹⁸ Nase hamba si cokulecela lukulu, no kuwuya ne nyuma kanyhi, Wuciwumifye du, nase cokukumya gwegwe.

¹⁹ Gwe go Muwaha Mulungu, u Mulungu we mihanga, wucigomole, wucilanje ko lusungu lwako, nase coponywa.