Zabuli 78 - Luganuzi Luswanu Kuli Wanhu Wose 2002

Mulungu ne wanhu wakwe

¹ Ale hulicizenyi wijize wangu, anye nyo wanhu wangu, muteje likutu muhulicize zinghani zangu.

² Ane nolonga nanye mu nzila ye vihwanicizo, nomulolosezenyi ze zifumbo ze katali,

³ ze zinghani zono cazihulika, kanyhi no kuzimanya, zinghani zono walezi wetu waciloloseza.

⁴ Nase hamba si coleka kuwasimuliziza, i wana wetu, cowasimuliziza lulelo, lono lukuza kuli zo wuwaha wo Muwaha Mulungu, kuli ze mapoto gakwe gono yagetuma.

⁵ Hambi nha yawika wulajilize kuli Waisilayeli, na kuli lulelo lwa Yakobo, yakasimya wuhomelezi. Yakawalajiliza walezi wetu, vyono wawejize ne wana wawo malajilizo gakwe.

⁶ Ho wanhu we ndelo yono yikuza wagamanye, heya, i wanhu wono wolelwa hanyuma, wagamanye, nawo ho wawejize i wana wawo.

⁷ Nawo ho wasume kumwitumbila Mulungu, ho walece kugasemwa i metumo go Mulungu, langa ho wagebatilile lukulu i malajilizo gakwe.

⁸ Walece kuwa nha vyono wali i walezi wawo, wono wali wabedegazi kanyhi wafyuzi, lulelo lono lusina wulunji we nyikala, wono wukamile, u lulelo lono lusina wihuwilwa kuli Mulungu.

⁹ I wanhu wa Efulayimu, mwizuwa lyo wulugu, wakatiza wakawuya ne nyuma, akuno ho webate no wupinde hamonga ne zisonga mu mawoko.

¹⁰ Si wasaka kwibata cilagane co Mulungu, kanyhi walema no kugatyatya malajilizo gakwe.

¹¹ Wakasemwa zono Mulungu yali yetumile, ze mapoto gono yali yawalajila.

¹² Yanoza mapoto hali walezi wawo, mwilolo lya Sowani mu yisi ya Misili.

¹³ Yalitemanula lilenga, yakawalowosa wene, yakaganoza malenga geme wima nhe lijinji.

¹⁴ Mu mapango ge misi, yawatonga ne livunde ninga mu cilo cose, yawatonga no wuzelu wo moto.

¹⁵ Yagapandula matalawe mu nyika, yakawang'wesa malenga, mu wulawa mu visolo.

¹⁶ Kanyhi yalavya malenga wulawa mwi'talawe, yakagahulumya nha makolongo.

¹⁷ Ninga hamba nhavivyo, vyo wakacila du kumusutizya Mulungu, sunga na mu nyika, wakamufyulila u Mulungu Mono Yalawiliciye.

¹⁸ Wakamujela Mulungu mu zinhumbula zawo, wakusaka wapegwe ndigwa yono weneco wasakaga.

¹⁹ Wamulonga Mulungu wakutya, “Alu mwene mbeka, Mulungu kosuma kucipela ndigwa mu muno mono nyika?

²⁰ Hamba yiwe, heya mbeka yatowa litalawe, malenga gakahuluma nhe kolongo, ninga aluno ma, mbeka kosuma kucipela ndigwa, hamonga no kuwapela wanhu wakwe nyama?”

²¹ Nayo Muwaha Mulungu yali yeza kuzihulika zizo, yakawa kukolwa ne likuwo, likuwo lyakwe likawakolelwa i wana wa Yakobo, no kumwinucila Isilayeli,

²² vyono si wamwihuwila Mulungu, hamba kwihuwila kose vyono kosuma kuwaponya.

²³ Ninga hamba yiwe nhavivyo, yagalajiliza mavunde ga kucanyha, yakayidigula milango ya ku wulanga,

²⁴ yakawagwisiza Mana ho walye, yakawapela wuhemba wa ku wulanga.

²⁵ Hodu wakalya ndigwa ye wamalayika, nayo Mulungu, yakawapela ndigwa, mu nghango nha vyono wasaka.

²⁶ Yakayinoza mbeho ya kucilima yipute muno muno, na kwe vilungo vyakwe, yakayitonga mbeho ya kutakama,

²⁷ yakawaletela zindeje nyinji muno wanhu wakwe, zikawa nyinji kotya musawawa wa mwi'lenga,

²⁸ ne zindeje zizo zikagwa haciligati ye nghambi yawo, zikapilima mahema gawo gose.

²⁹ Ne wanhu wakalya wakeguta. Mulungu yawapela cono wasakaga.

³⁰ Ninga na lono wali wakali wena, no wuhile wo kulya, ne ndigwa lono yali yikali mu milomo yawo,

³¹ lo lulo baho likuwo lyo Mulungu, likawacila, Mulungu, yakawawulaga i wanhu, wono wali wali vilungo muli wene, yakawagwisa ne wazelelo wa Isilayeli.

³² Ninga hamba nhavivyo, vyo wakacila du kumusutizya Mulungu. Si wehuwila yaye, hamba yawe yali yetuma mapoto mawaha.

³³ Holeka Mulungu nayo, yakavidumulila i vilo vyawo nho muhe, ne myaka yo wikale wawo, mu wugaye wo kogofya.

³⁴ Na mu nghango yono yajendelelaga kuwawulaga, awalya wono wasigalaga, wakajendelela kumupitucila, wakanena wubi wawo wakamupitucila Mulungu, kwe zinhumbula zawo zose.

³⁵ Wakumbucila vyono Mulungu, yo mudimi wawo na vyono u Mulungu Mudaha Vyose, yo mukombozi wawo.

³⁶ Ninga wamukonga Mulungu, na muli zose zono wamulonjelaga, zali za wulambi du.

³⁷ Hamba si wali wehuwilwa kuli mwene, hamba si wasuma no kwibata cilagane cakwe.

³⁸ Ninga hamba nhavivyo, Mulungu yakawa yali lusungu, yakawanenela wubi wawo, hamba si yawongomeza yaye. Yeyimila likuwo lyakwe kali kenji, hamba si yalileceleza likuwo lyakwe limukole muno.

³⁹ Mwene yakumbucila vyono wene wawa wanhu du, wehwanile mbeho yono yipulutaga yiwa kwajilila.

⁴⁰ Wihwesaje ta, kali kalinga wamufyulilaga mu nyika! No kumukalaza mumo mu nyika!

⁴¹ Wakamujela Mulungu kali kenji muno muno, wakamukalaza muno muno yuyo, Mono Yelile wa Isilayeli.

⁴² Hamba kukumbucila i vilungo vyakwe, hamba za mwizuwa alilya lono yawaponya, mu miwoko ye walugu wawo,

⁴³ lono yetumila mezino mawaha mu yisi ya Misili, hamonga ne mapoto ga mwilolo lya Sowani!

⁴⁴ Yagahundusa malenga ga mu makolongo, gakawa sakami, Wamisili ho walece kutuga malenga go kung'wa.

⁴⁵ Yawagumilila mawumbi ge mahazi gono gawagaza, hamonga ne mabula gono, gawambuza wakatuga wambuce wuwaha.

⁴⁶ Yakazikombola zi nzije, zikalya vilimwa vyawo, hamonga no kuyihodanga migunda yawo.

⁴⁷ Yayihodanga migunda yawo ya mizabibu, ne mvula ya mabwe, hamonga ne mikuyu yawo ne mbeho nghali muno.

⁴⁸ Yawulaga zing'ombe zawo, ne mvula ye mabwe zingholo zawo, yakaziwulaga ne limuli.

⁴⁹ Yalileka likuwo lyakwe liwazize, hamonga no wukali, ne simbili no wugaye, hamonga ne litewa lye wamalayika wawulaji.

⁵⁰ Hamba si yalimila likuwo lyakwe, hamba si yenda kuwatetela yaye, langa yawawulaga no wutamwa we lihuhuji.

⁵¹ Kanyhi yawawulaga i wana wose wa Misili, i walongozi kulelwa, heya, ndawililo ye vilungo vyawo mu mahema ga Hamu.

⁵² Hanyuma yawahamya wanhu wakwe, nhe zingholo, yakawalongoza ku nyika, nhe litewa lye zimitugo.

⁵³ Yawajendya wapolile, hamba si wogopa yaye, langa lilenga likawagubiciza walugu wawo.

⁵⁴ Nayo yakawahamizya ku yisi yakwe, yono yelile, mu matunda gono yagateka mweneco, kwe vilungo vyakwe.

⁵⁵ Yagawinga makungugo ku mwande yawo, yakawapela Isilayeli yisi zawo ziwe zawo, yawapela no wikalo we zimbeyu zakwe.

⁵⁶ Hamba nhavivyo, wakacila kumujela, no kumufyulila Mulungu Mono Yalawiliciye, hamba si webata zo wuhile wakwe yaye.

⁵⁷ Wakawa wasina cihuliko, hamba kuwa wehuwilwa, wakawa nha vyono wali wenha walezi wawo, wakayumba-yumba nhe songa yono si nghangale.

⁵⁸ Wamukalaza Mulungu, mu wuhemba milungu yinji mu wuhembi wawo, holeka wamunoza Mulungu yawe, no wivu ku soko ye makumbicilo ge milungu yawo, ye vihwani.

⁵⁹ Nayo Mulungu yali yeza kuziwona zizo, hodu yakakolwa ne likuwo, no kumulemela lukulu Isilayeli.

⁶⁰ Yakawuleka no wikalo wakwe wa ku Shilo, wikalo wono yali yekaye muli wanhu.

⁶¹ Yakalileka ne Lisanduku lye Cilagane, lisolwe ne walugu, Lisanduku lyono lina vitanjilo vye vilungo vyakwe, hamonga no lukumyo lwakwe.

⁶² Yawasimbila wanhu wakwe mweneco, yakawakombola ho wawulagwe ne walugu wawo.

⁶³ Ne wazelelo wawo wose, wakamalicila ku wulugu, i wahinza nawo, wakekala si wawatujile, wo kuwatola yaye.

⁶⁴ I wakohani wawo nawo, wakawulagwa wose, ne i wacekulu zawo, si wakombolwa ho wawalilile yaye.

⁶⁵ Ninga ku ndumilizo yayo, u Muwaha Mulungu yakenuka nha yakulawa mu nhongo, nha citung'ati mono yasangalazwe ne divayi.

⁶⁶ Yakawatowanga walugu wakwe, no kuwagomola ne nyuma, yakawakozeza cevu lukulu cibitilila.

⁶⁷ Hamba nhavivyo ninga, yayilema mhuga ya Yusufu, hamba si yawahagula wo mulango wa Efulayimu.

⁶⁸ Langa yawahagula wo mulango wa Yuda, kanyhi yakalyenda muno ne litunda lya Sayuni.

⁶⁹ Nayo yakayizenga Nyumba yakwe kuko, yikawa yinha nho wikalo wakwe ku wulanga, yikawa yihwanile ne yinze, yono yayisimya yikamile cibitilila.

⁷⁰ Yamuhagula Dawudi mwitumami wakwe, mono yamusola ku wulawa kwi dimo,

⁷¹ yamucema lono yali yali mu wudima litewa lyakwe, yakamunoza ho yamudime Yakobo, mono lye kungugo lyakwe, yawadime Isilayeli wanhu wakwe.

⁷² Nayo Dawudi yakawadima, mbeka kwe nhumbula yakwe yose, hamonga no kuwatonga ko wunghula, wuwaha muno muno.