Zabuli 74 - Luganuzi Luswanu Kuli Wanhu Wose 2002

Kulomba likungugo liponywe

¹ Go Mulungu, alu nhawule wacitajila lukulu? Alu so cici likuwo lyako likwaka kuli zingholo zako!

² Wukumbucile wihangulize wako, wono wawahagula gwegwe ku wulawa na katali, mbeyu yono wayikomboza yiwe sawo yako, litunda lye Sayuni lyono walinoza liwe wo wikalo wako.

³ Ale winuce wukole mucanyha, ye matongo gagano ge vilo vyose. Nawo walugu wakondya kuhodanga vinhu vyose, vya mu Nyumba yo Mulungu.

⁴ Walugu wako wakuzoza mu Nyumba yako, ne lizozo lyo wusume! Waziwicile mumo ne zibendela zo wusume wawo!

⁵ Wehwana no mutenya zingwagu, mono katemaga mabici ne nhemo yakwe.

⁶ Wakawubenanjiza mulango we Nyumba yo Mulungu, kwe zinhemo zawo hamonga ne zinyondo zawo.

⁷ Wakayiticimiza no moto Nyumba yako yono yelile. Wakahatovula i hanhu hono agwe wukogopwa.

⁸ Vyono wali welahize sunga wacimale ase wose, holeka wakahaticimiza mu yisi yose, hanhu hose hono cekongholelaga kukuhemba.

⁹ Vitanjilo vyetu vyose vyono vyelile, sicikuviwona lu, alu ceza cisina hamba muwizi. Hamba si cimanyile zizi, zojendelela kuwa nhavivi sunga nili!

¹⁰ Alu 'gwe go Mulungu, u mulugu ho kojendelela kukusekanga sunga nili? Alu mwene ho wolitovula litagwa lyako sunga cibitilila?

¹¹ So cici lo wukulema kucitaza lu? Nhawule wuyiwicile ku mugongo miwoko yako?

¹² Agwe go Mulungu, yo gwegwe mono wuli mutemi wetu ku wulawa katali na katali, mono kunozaga mhonelo mono'nze yose.

¹³ So vilungo vyako, watemanula lilenga, wukayitijinha mitwe ye mazoka ga mwi'lenga.

¹⁴ Wayitijinha mitwe ye lilimu, lyono likucemwa Lewiyatani, wukawa kuzipela zinimu za mu mbago muvimba walyo.

¹⁵ Agwe yo gwegwe mono wanoza mivwilo ne vikolongo, wukaganyaza i makolongo mawaha.

¹⁶ Misi yo yako, sunga cilo naco co cako, waviwika mwezi ne lizuwa hanhu hayo.

¹⁷ Agwe yo gwegwe, mono wayiwika mipaka yose ye yinze, yo gwegwe mono wawika vipango vye cibahu, ne vipango vye mbeho.

¹⁸ Ninga wukumbucile 'gwe go Muwaha Mulungu, wubedegazi wono wukulawa kuli walugu wako, likungugo lyono lipuwile, likulitovula litagwa lyako.

¹⁹ Wulecele lukulu 'gwe go Mulungu, kugagumilila malimu, wumi we wendece wako, kanyhi wulece kuwasemwa wanhu wako, wono wali mu wugaye.

²⁰ Wucikumbucilaje i cilagane cako kuli'se! Yisi nayo yimemile wuwulaji wose, hanhu hose ha citi,

²¹ Holeka wulece kuwaleceleza wali wene, ho wakozwe cevu, wose wono wakwiwonelwa. Nawo waciwa hamonga ne wanjile, wakukumye gwegwe.

²² Ale winuce go Mulungu, witetele, wukumbucile wubedegazi we vilo vyose, wono wukulawa kuli wono si wakumanyile.

²³ Wulece kugasemwa mazozo ge likuwo, gono gakulawa kuli walugu wako, hamonga ne liyowo lye vilo vyose, lya wono wakwisumaniza nagwe.