Zabuli 73 - Luganuzi Luswanu Kuli Wanhu Wose 2002

CITABU CE KADATU (Zabuli 73–89 ) Wiling'ano wo Mulungu

¹ Mbeka Mulungu yo muswanu kuli Isilayeli, muswanu na kuli wono wena nhumbula nhelevu.

² Nali neza nili behi, no kwikobala, na hadodo du nali nhelele,

³ hambi nha nali kuwawonela wivu i wedunhumuzi, lono nali neza kuwona i wabi wakumoteswa.

⁴ Hambi wawo nha si waganagwa no wugaye yaye, i miwili yawo mitelevu, kanyhi wena ne vilungo du, wakamile.

⁵ No wugaye we wanhu, hamba si wuwaganaga wene, kanyhi hamba si wagazikaga, nha vyono wanji wagazikaga.

⁶ No widunhumuzi waweza kuli wene, nha mukufu mu singo zawo, no wukali nawo, wawa nha wo mwenda wawo wo kuvwala,

⁷ Ne meso gawo gavimbile so wujine, zinhumbula zawo zilavyaga ze mahweso gawo mabi,

⁸ Wendile kuwezwajiza wanhu wanji, no kuwalonga makani mabi, wedunhumulaga no kupanga zo wiwonela wanhu wanji.

⁹ Na kwe milomo yawo, wawulongaga vibi wulanga, na kwe zinimi zawo, wetapaga mono'nze.

¹⁰ Sunga ne wanhu wo Mulungu nawo wakuwatyatya, no kwihuwila zose zono wakuzilonga.

¹¹ Akuno wakutya, “Mulungu si kozimanya yaye! Hamba Mulungu Mono Yalawiliciye, si kosuma kuziwona ng'o!”

¹² Nhavivi vyo wenha i wanhu wabi, wakwizize vyose no kuciziliza.

¹³ Alu ne hongo, neyeza bwete nhumbula yangu, no kwilanjilila ndece kwituma wubi?

¹⁴ Misi yose nhuga magazo, nagwe kumhelaga wulipicizwe, hakali mitondo nhondo zose.

¹⁵ Nane mhali nonje nha vyono wene wakulonga, si nali niwe nili munhu we mbeka muli wanhu wako.

¹⁶ Nane nghajela kuyihwesa nghani yiyi, ninga yikawa nghani nghamu muno muno kuli'ne,

¹⁷ sunga langa nali neza kuhelela hono helile hako, baho langa ho namanyila zono zowagana i wabi.

¹⁸ Mbeka, agwe kuwawikaga i hanhu ha cinheleza, wukuwanoza wagwe wajilile.

¹⁹ Wakongomezwa nhinicizo, no kupatilwa kutali ko wogofye.

²⁰ Gwe go Muwaha Mulungu, kolo wukusinhuka, wene wakwajilila kamonga, hamba kukumbucilwa kanyhi, wawa kwihwana nha ndoto, zono munhu kazisemwaga, lono yakwinuka hakali mitondo.

²¹ Nali neza kuwuwona wusungu mu nhumbula yangu, no kuhomeka mu ciselinji cangu.

²² Nghawa mhuwile hamba kumanya cinji, nghehwana nhe lilimu hali'gwe.

²³ Ninga hamba yiwe nhavivyo, ane nili kuli 'gwe du vilo vyose, 'gwe go Muwaha Mulungu! Agwe, wunyibate muwoko no kumhela vilungo.

²⁴ Agwe yo gwegwe du. Mono wukunhonga ko wulanjizi wako, na ku mudumo, kombocela mu lukumyo lwako.

²⁵ Alu nani 'mbi kanyhi ku wulanga, mono kosuma kunhaza, langa hono si gwegwe du? Na hono niwe nili hamonga nagwe mono'nze, hamba sinosuma kwanjila cinji yaye.

²⁶ Hamba niwe nyhepuciywe vilungo, mu muwili na mu nhumbula, agwe go Mulungu, yo gwegwe go vilungo vyangu, ne ligawo lyangu yo gwegwe du cibitilila.

²⁷ Na muli wose mono kokwitemanula nagwe, ale, yuyo mbeka kofwa du. Nayo mono si yakukuvumila, yuyo nayo agwe komongomezeza lukulu.

²⁸ Ninga viswanu kuli'ne, niwe behi nagwe go Mulungu, hambi agwe go Muwaha Mulungu nha yo mhonelo yangu. Nane nozanza ze milimo yakwe yose yono witumile!