Zabuli 72 - Luganuzi Luswanu Kuli Wanhu Wose 2002

Kumulombela mutemi

¹ Gwe go Mulungu wumupele mutemi ning'aniza yako, wumupele mwana wo mutemi wiling'ano wako,

² ho yaliteme likungugo lyako kwe ling'ani, ne waciwa wako nawo, ko wiling'ano.

³ Ho hawe no mulamu mono yisi, ne yisi yose yimeme wiling'ano wako.

⁴ U Mutemi yawatetele, i wasocele wa mu nghungugo, yawataze wana we waciwa, langa yawongomezeze lukulu i wanhu wabi.

⁵ Mutemi yawe ne vilo vinji vyo wikale wakwe, nhe lizuwa, na kanyhi nho mwezi, mu zindelo zose.

⁶ Mutemi yawe nhe mvula yo wunyunyute mu migunda, yawe nhe mvula yono yiyitonyelaga yisi.

⁷ No wiling'ano wulawilicile, mu vilo vyose vyo wikale wakwe, no mulamu nawo wonjezece muno, sunga mwezi kolo wukuduma kumulika.

⁸ Yateme ku wulawilila lilenga sunga lilenga, kanyhi ku wulawa kwi kolongo lya Efulata, sunga ko ku mhelo ye yinze.

⁹ Na ku mwande yayo, i walugu wakwe womwinamila. Nawo wono wakwisumaniza nayo, wolokwigwisa weneco mu manghundi.

¹⁰ Ne watemi we Talishishi, hamonga ne vizingwa, wose womulipa kodi, watemi we Sheba na Seba, nawo womuletela vipegwa.

¹¹ Ne watemi wose wa mono'nze, womupela cogopo, sunga ne wanhu we makungugo gose, womwitumamila.

¹² Nayo komuponya u muciwa mono yakumulomba, sunga no muciwa mono yasina munhu wo kumutaza.

¹³ Mwene, kowawonela lusungu wanhu wasocele ne waciwa, kowaponya wono wali mu mikalile yo wugaye.

¹⁴ Kozikomboza zinhumbula zawo, mu wiwonelwe no wuwulaji, hambi wumi wawo, nha wina cambuzi ciwaha muno muno kuli mwene.

¹⁵ Mutemi yawe ne vilo vinji vyo wikale wakwe, yabocele vipegwa vye zahabu ku wulawa ku Sheba, ne wanhu nawo wajendelele kumulombela kuli Mulungu vilo vyose, ho yamoteswe misi yose.

¹⁶ Yisi nayo yiweze no wuhemba winji muno, wumeme na mu matunda ga Lebanoni, ne wanhu wameme mu makaya, nawo womoteswa wawe nhe mahanze.

¹⁷ Litagwa lyo Mutemi, lyeze no lukumyo vilo vyose, no lukumyo lwakwe lwikale sunga ha nghango, yo wung'alale we lizuwa. Ne makungugo gose, gamoteswe muli Mwene, sunga ne wanhu wose wamutye yo mumoti.

¹⁸ Yalumbwe Muwaha Mulungu, u Mulungu wa Isilayeli, mono kanozaga mapoto yali wene.

¹⁹ Ilitagwa lyakwe lye nhojo, likumywe cibitilila. No lukumyo lwakwe lumeme mu yinze yose. Heya, heya!

²⁰ Awu wo mudumilizo we malombo ga Dawudi, u Mwana wa Yese.