Zabuli 71 - Luganuzi Luswanu Kuli Wanhu Wose 2002

Wulombe wo mukombi

¹ Gwe go Muwaha Mulungu, ane nghutiziza kwako, holeka wulece kundeka ho ngholwe cevu.

² Wunimule, wumhonye, ku soko yo wiling'ano wako, wuteje likutu lyako!

³ Weze wuli wutizizo, no wihundiko wangu, ne vilungo vyono vikamile vyo kumhonya, hambi 'gwe nha yo gwegwe go mudimi wangu, kanyhi yo gwegwe go wihundiko wangu.

⁴ Wumhonye 'gwe go Mulungu wangu, mu miwoko ye wabi. Wumhonye mu wulawa mu wanhu wabi ne wawulaji.

⁵ Hambi 'gwe go Muwaha Mulungu, nha yo gwegwe du mono nghwitumbiye. Gwe go Muwaha Mulungu, ane nghwitumbiye gwegwe ku wulawa wudodo wangu,

⁶ nghwitumbiye ku wulawa vyono nalelwa, hambi nha yo gwegwe mono wandavya mu'nda ya yaya. Yo gwegwe du mono nghukumyaga vilo vyose.

⁷ Nane naweza colecezo co wizine kuli wenji, ninga agwe yo gwegwe go wutizizo wangu wono wukamile.

⁸ Mulomo wangu wumemile zo lukumyo lwako, hamonga ne lilumbo lyako misi yose.

⁹ Kanyhi wulece kundeka kolo nakombipa, na kolo vilungo vyangu vyamalika wulece kundeka.

¹⁰ Hambi i walugu wangu nha wakunonganga, nawo wono wakusepasepa, wakwilumbaniza hamonga,

¹¹ wakutya, “Ale, Mulungu yamuleka, holeka mutyatyenyi mukamwibate, hambi lu nha hasina kanyhi wo kumuponya!”

¹² Holeka wulece kwikala kutali nane go Mulungu, wuze mbela wunhaze, 'gwe go Mulungu wangu,

¹³ ho wakozwe cevu no kongomela, wose wono wakwisumaniza nane, nawo wose wono wakusacila zimbi, wakozwe cevu no kuzwajizwa.

¹⁴ Ninga ane nolindila, akuno nitumbiye, kanyhi nokukumya kali kenji muno muno.

¹⁵ Nane nosimula ze metumo gako ge ling'ani, kanyhi nokwanza ze metumo gako, ge mhonelo misi yose, hamba gawe nha gapulute mahala gangu.

¹⁶ Nane, go Muwaha Mulungu, nokwamuliziza mu metumo gako mawaha, nokwanza zo wuswanu wako gwegwe du wuli wene.

¹⁷ Gwe go Mulungu, yo gwegwe du, mono wanyijiza ku wulawa wudodo wangu, holeka nane si nolecela lukulu, ku wanze we metumo gako go wizine.

¹⁸ Wulece kundecela lukulu 'gwe go Mulungu, hamba niwe nawa nili mukombi nina ne zimvwi, sunga langa kolo nakondya kuwalonjela ze vilungo vyako, wanhu wo lulelo lono lukuza.

¹⁹ Gwe go Mulungu i vilungo vyako, hamonga no wiling'ano wako, vificile ko ku mavunde. Agwe yo gwegwe mono wanoza zimbaha muno. Alu go Mulungu yo nani 'mbi, kanyhi mono yehwanile gwegwe?

²⁰ Kundetela magayo menji mabi, ninga hamba yiwe nhavivyo, agwe komhela kanyhi wumi no kunyinula.

²¹ Konyonjelezeza kanyhi ne lilumbo lyangu, hamonga kanyhi no kusindamika.

²² Nokwimbila zo lukumyo kwe lisumbi, ku soko yo wihuwilwa wako, 'gwe go Mulungu wangu, nokwimbila nyimbo kwe lisumbi, agwe mono welile wa Isilayeli.

²³ Nane nowa no wusangalale, lono nghwimba zo lukumyo lwako, nokwimba kwe nhumbula yangu yose, hambi nha wamhonya.

²⁴ Nane nosimulila zo wiling'ano wako misi yose, hambi nha wanyihwesezaga zimbi ninga lu, wakozwa cevu hamonga ne zisoni.