Zabuli 7 - Luganuzi Luswanu Kuli Wanhu Wose 2002

Wulombe wo munhu mono yakwiwonelwa

(Cililo ca Dawudi ku soko ya Kushi, wo mulango wa Benyamini)

¹ Gwe go Muwaha Mulungu, Mulungu wangu, ane nghwitumbiye gwegwe, umhonye kuli wose wono wakunhyatilila, wumbuse muli wene.

² Na hono wulece kunozeza nhavivyo, wene wokuza wahawanje nha simba, wanghwejele kutali, kono kowa kusina mono komhonya.

³ Gwe go Muwaha Mulungu, Mulungu wangu! Hono niwe nitumile yinji ya muli zizi, na hono niwe niyitipiza ko wubi miwoko yangu,

⁴ na hono yiwe lunji nimutendela vibi muyangu, hamba lunji niwe nimutamisa mulugu wangu mbula soko,

⁵ Ale hodu lece mulugu wangu yanhyatilile, yanyibate, yawukanyanjile wumi wangu, yambulaje.

⁶ Ale, wuzize mu wukali wako 'gwe go Muwaha Mulungu, wulimile likuwo lye walugu wangu. Winuce 'gwe go Mulungu wangu, hambi 'gwe, nhondo zose nha kusakaga ling'ani yifisilizwe.

⁷ Wugakonghole hali gwegwe makungugo gose, nagwe ho wugateme ku wulawa ku wulanga.

⁸ Gwegwe, 'gwe go Muwaha Mulungu, kugaling'anizaga makungugo, ale wuning'anizizaje nane mu nghango yo wiling'ano wangu, mu nghango yo wutelevu wangu, wono nina nawo.

⁹ Wavu we wanhu wabi wudume, wumukamye munhu we ling'ani, 'gwe go Mulungu mono kwitumaga ling'ani, mono wuzimanyile zose ze cinyele za mu zinhumbula, ne mahweso ge wanhu.

¹⁰ U Mulungu, yo ngula yangu yono yikunyhitila mwene kawaponyaga i wanhu watelevu.

¹¹ U Mulungu, yo hakimu we ling'ani, mwene kamulipicizaga munhu mubi nhondo zose.

¹² Ne wanhu nawo hono walece kupituka, u Mulungu kowunola mumaje wakwe, kowutawika wupinde ku wulunji wawo,

¹³ nayo kowikaniziza lukulu vitwalo vyakwe, vyo kuwulajila, no kuzikangaliza mu moto zisonga zakwe.

¹⁴ Ninga i wanhu wabi wamemile wubalya, wegute wubi, nawo wolela wukonji, wahimbaga yikombo yitali.

¹⁵ Ne mitego yono wawatejile wayawo, wakwigwiza kanyhi mumo weneco.

¹⁶ No wubi wawo, wowawuyila weneco du, kanyhi wokwitamisa weneco no wukali wawo.

¹⁷ Nane nomukumya Muwaha Mulungu, ku soko yo wuswanu wakwe, kanyhi nokwimba zo lukumyo lwakwe Muwaha Mulungu, u Mulungu Mono Yalawiliciye.