Zabuli 68 - Luganuzi Luswanu Kuli Wanhu Wose 2002

Lwimbo lwo wusume

¹ U Mulungu kenuka, ne walugu wakwe weyagala, na wono wamusulile, wose wakumutiza!

² Nawo wakupemheluswa, nha vyono lyosi lipemheluswaga ne mbeho, ne wabi wose wokwajililila lukulu, hali Mulungu, hamba kwijela yaye, nha vyono lihula lyenjedukaga ha moto.

³ Ninga we ling'ani wasangalaye, no kusecelela hali Mulungu, wakusecelela akuno wakwimba so nyemo.

⁴ Mwimbilenyi Mulungu, kanyhi mulikumye ne litagwa lyakwe, nozelezenyi nzila yakwe, mwene mono yakujendela mu mavunde, litagwa lyakwe yakucemwa, Muwaha Mulungu, ale, musangalale hali mwene.

⁵ Mulungu mono yekaye hono helile hakwe, mwene yo Sogo ye wana wono wasina walezi, kanyhi yo mudimi we wafwile.

⁶ Nayo Mulungu yo kawapelaga waciwa, wikalo wono wikalaga, kanyhi kawawopolelaga wawopwa, no kuwasangalaza, ninga i wabedegazi, wojendelela kwikala mu yisi yono yinyalile.

⁷ Gwe go Mulungu, lono wawatonjela wanhu wako, lono wali wali mu muhinzo wawo mu nyika,

⁸ Yinze yacicima, sunga no wulanga nawo wukatonya mvula, ku so wuze wako, go Mulungu wa Sinayi, heya, so wuze wako go Mulungu wa Isilayeli!

⁹ Gwe go Mulungu, wayitonyeza yisi mvula mbaha, wukayidejefya lono yali yeza kusakala.

¹⁰ Ne wanhu wako wakatuga mumo wikalo, na so wuswanu wako, wukawapela waciwa visakwa vyawo.

¹¹ U Muwaha Mulungu kalavyaga wulajilize kamonga du, nawo wacekulu yipuga yiwaha, wawa kuzitandaza zinghani zizo,

¹² “I watemi hamonga ne mapuga gawo, wose wakutiza!” Iwacekulu nawo ku zikaya, wakugawana vyono vitecigwe.

¹³ Alu nhawule wanji wa muli nyenye wagonile mu mabululu, mu wugono we zinziwa mwizuwa lyo wulugu? Mono movili vihwani vye zinziwa vya fweza, vyono vina mabawa gayo gakung'alala zahabu.

¹⁴ U Mulungu Mudaha Vyose, yali vilungo, yali yeza kukondya kuweyagaza watemi, mwi'tunda lya Salimoni, ne seluji nayo yikawa kutonya mwi'tunda lilyo.

¹⁵ Matunda ge Bashani, go matunda matali muno, matunda ge Bashani, gena vizuli vinji muno!

¹⁶ Nanye mo vizuli! Nhawule lo mukuliwonela wivu litunda, lyono Mulungu yalihagula, ho yekale mucanyha yalyo? Ninga Muwaha Mulungu, kokwikala kuko cibitilila!

¹⁷ Nayo Muwaha Mulungu yakulawa ku Sinayi, yakuza hono helile hakwe, yali hamonga ne lipuga yiwaha, lya maelufu na maelufu lye matuka go wulugu.

¹⁸ Yakubita kucanyha, akuno yali hamonga ne mateka gakwe, kabocela vipegwa kuli wanhu, heya nhavivyo sunga na kuli wanhu i wabezi, nayo Muwaha Mulungu kokwikala muli wene.

¹⁹ Muwaha Mulungu yalumbwe, mono kacidinghulilaga mitegulo yetu mwizuwa ne zuwa. Mwene yo Mulungu mono kaciponyaga.

²⁰ Mulungu wetu, yo Mulungu we mhonelo, nayo Muwaha Mulungu, yo kaciponyaga mwi'fwa.

²¹ Nayo Mulungu, koyipondanjiza mitwe ye walugu wakwe, heya, i mitwe ya wose, wono wakali wadindimiye zo wituma wubi.

²² Muwaha Mulungu yalonga yakatya, “Ane nowagomola i walugu ku wulawa ku Bashani, nowagomola ku wulawa mu visolo vye lilenga.

²³ Agwe ho wusume kukola mu zisakami zawo, sunga ne mabwa nago gayinamhe nha vyono gosuma.”

²⁴ Gwe go Mulungu i mijendele yako, yo wusume nha yijeye calinze, i mijendele yo Mulungu wangu, u Mutemi wangu, sunga ko ku hanhu hakwe hono helile!

²⁵ I wembi walongoye ku mwande, mu nyuma kowali watowa masumbi, haciligati naho, wahinza watowa vigoma.

²⁶ “Mukumizyenyi Mulungu haciligati, ye lipuga yiwaha lye wanhu. Mukumyenyi Muwaha Mulungu, anye nyo lulelo lwa Isilayeli!”

²⁷ Yamule Benyamini, u mudodo wa wose, ho watyatye i walongola wa Yuda ne lipuga lyawo, ha nyuma ho waze wawaha wa Zabuloni, na wa Nafutali.

²⁸ Gwe go Mulungu, ale wulajilaje wuwaha wako, wuwaha wono wetumamila ku soko yetu,

²⁹ mu wulawa mu Nyumba yako ku Yelusalemi. Ne watemi wokuziza du, wena ne vipegwa vyawo mu mawoko!

³⁰ Wugakalipilaje le, malimu gago gono gekalaga mwi'lamba, litewa lye zindama hamonga ne zinghongolo, sunga makungugo gago gakupele cogopo, hamonga no kukulipa kodi. Ale, wuweyagaze wanhu wawo i wenda wulugu!

³¹ Wawaha watambule, wokuza ku wulawilila Misili, Waetiyopiya nawo, womwinulila Mulungu miwoko yawo.

³² Nanye mo wutemi wa mono'nze, mwimbilenyi Muwaha Mulungu, mwimbilenyi Muwaha Mulungu zinyimbo zo lukumyo,

³³ mwimbilenyi mwene mono yekaye ku wulanga, wulanga wono wali katali na katali. Muhulicizenyi lono yakulavya lizi lyakwe kwe vilungo.

³⁴ Mwanze zo wuwaha wo Mulungu! Lukumyo lwakwe luli muli Isilayeli, lukumyo lwakwe luli mu wulanga.

³⁵ Mulungu yo we cogofyo muno, i hanhu hakwe hono helile, heya, mwene yo Mulungu wa Isilayeli! Nayo kawapelaga wanhu wakwe vilungo no wuwaha. Mulungu yalumbwe!