Zabuli 60 - Luganuzi Luswanu Kuli Wanhu Wose 2002

Kulomba wukombozwe

¹ Gwe go Mulungu, wacitaga no kucipondajiza, wakolwa ne likuwo, ninga alu, cikukunena wucigomolele zo wuswanu wako.

² Kuyicicimya yisi no kuyipandula, alu wukande mazatu gayo, hambi nha yeza kupanduka.

³ Kuwaleka wanhu wako wenjile mu magayo, nalu ceza pepesuka nha wono wagalile divayi.

⁴ Kuwasugula awalya wono wakogopile, ho wasume kuyityega songa.

⁵ Wuciponye kwe vilungo vyako, wucipitule no wulombe wetu, i wanhu wako wono wuwendile, ho wekale wapolile.

⁶ U Mulungu kalonga ku wulawa hono helile hakwe katya, “Alu nobita sangalaye nghayigawe yisi ya Shekemu, ne lilolo lya Sukoti nalyo, noligawa kuli wanhu wangu.

⁷ Gileyadi yo yangu, sunga na Manase nayo yangu nhavivyo, ayi nayo Efulayimu, nha yo kofiya yangu ye cuma, nayo Yuda, yo nghome yangu yo wutemi.

⁸ Ayi nayo Mowabu, yo bakuli yangu yo kwizuguziza. I cilatu cangu naco, nocigumila ku Edomu, ho niyiteme. Nane baho langa ho nozoza kwe lizi, lyo wusume kuli Wafilisiti.”

⁹ Alo nani lu, mono konhegula, kwi'kaya lye ligomawakali? Hamba nani mono konhonga sunga fice ku Edomu?

¹⁰ Gwe go Mulungu, alu wacilecela lukulu du hongo? Hamba lu sikojendela lukulu, kanyhi hamonga ne mapuga getu?

¹¹ Wucipele wutazi kuli walugu wetu, hambi wutazi wono wukulawa kuli wanhu, nha si wukwiliye cinji yaye.

¹² Ase cosuma du ko wutazi wo Mulungu wetu, Mwene kowapondanjizanga i walugu wetu.