Zabuli 6 - Luganuzi Luswanu Kuli Wanhu Wose 2002

Kulomba wutazi mwi'daha lyo wugazice

(Kuli mwimbizi: Hamonga ne vitumamilwa vye zinghunzi vye masumbi nha vyono winha wimbe wa Shemininti Zabuli ya Dawudi)

¹ Gwe go Muwaha Mulungu, wulece kunhacila kwe likuwo lyako, hamba wulece kundipiciziza mwi'kuwo lyako.

² Wumbonelaje lusungu, 'gwe go Muwaha Mulungu, hambi ane nha nili musocele, holeka wumhonye 'gwe go Muwaha Mulungu, hambi nha nghucicima sunga mo mu mafupa mugati.

³ Nghugazika muno mu nhumbula yangu, 'gwe go Muwaha Mulungu, alu kocela kunhaza sunga nili?

⁴ Wunangaje, 'gwe go Muwaha Mulungu wumhonye nhumbula yangu, wumhonye mwi'fwa so lusungu lwako.

⁵ Hambi kuko ku yinze ye wafu, nha kusina mono kakukumbucilaga yaye, hamba hasina munhu kuko mono kosuma kukulumba.

⁶ Nghataye muno muno ku soko ye cililo cangu co wusungu, vilo vyose ku cilo nghucisuluziza citanda cangu mahozi, na mu wulile wangu, nghuwusuluziza muto wangu.

⁷ Ne meso gangu gakatala so wukalale, gavimba ku soko yo wugazwe ne walugu.

⁸ Muwuce ha mwande yangu, anye wose mo wetuma wubi! Hambi Muwaha Mulungu nha yacihulika cililo cangu.

⁹ U Muwaha Mulungu kawuhulika wulombe wangu, u Muwaha Mulungu kavumila wulombe wangu.

¹⁰ Ne walugu wangu wose wokolwa cevu, kanyhi wogaya muno, wowuya ne nyuma no kuwona cevu nhinicizo.