Zabuli 57 - Luganuzi Luswanu Kuli Wanhu Wose 2002

Kulomba wutazi

¹ Wumbonele lusungu, 'gwe Mulungu wumbonele lusungu, ane nghutiziza kuli'gwe. Hambi mu mubeho we mabawa gako, nha mo mowuli wihundiko, sunga kolo magazo gaga mawaha gakupuluta.

² Nane nghumulilila Mulungu Mono Yalawiliciye, u Mulungu mono kafisilizaga visakwa vyangu vyose.

³ Nayo kohuliciza ku wulawa ku wulanga no kumhonya, kowakoza cevu wawo wono wakunyiwonela. Mwene Mulungu kondajila zo lusungu lwakwe, hamonga no wihuwilwa wakwe.

⁴ Nawo walugu wamhilime wenha masimba malya wanhu, ne meno gawo, gehwanile migoha ne zisonga, ne zinimi zawo zihwanile mumaje mukali.

⁵ Wunojeye wukumywe ko ku wulanga 'gwe go Mulungu, ne nhojo yako yiweze mu yinze yose.

⁶ Hambi i walugu nha wanhejile no lwavu, wangwize, nane nghuzizidika muno so wukalale. Wahimbiye likombo mu nzila, ninga hamba nhavivyo, weneco wo wakugwila mumo.

⁷ Gwe go Mulungu, nhumbula yangu 'ne yimile, yikamile, heya, nhumbula yangu yimile yikamile, holeka nane nokwimba, no kukusangalalila gwegwe!

⁸ Holeka winuce 'gwe go nhumbula yangu! Mwinukaje nanye nyo ndonondo ne lisumbi! Nane nosinhuka hakali mitondo muno muno.

⁹ Nane nokulumbila muli makungugo, go Muwaha Mulungu, kanyhi nokwimbila ze malumbo muli wanhu.

¹⁰ Hambi lusungu lwako nha luficile ko ku wulanga, no wihuwilwa wako wuficile ko kucanyha.

¹¹ Wunojeye wukumywe, ko ku wulanga 'gwe go Mulungu, ne nhojo yako yiwe mu yinze yose.