Zabuli 56 - Luganuzi Luswanu Kuli Wanhu Wose 2002

Kumwitumbila Mulungu

¹ Gwe go Mulungu, wumbonelaje lusungu, hambi wanhu wa nha wakusaka wambonele, madaha gose walugu wangu nha wamhilime.

² Misi yose walugu wangu wakunhowanga, nawo lu ho wenji muno muno, wawo wono wakwihoma nane.

³ Gwe go Mulungu u Mudaha Vyose lono woga wunyibate, ane nghwitumbiye gwegwe.

⁴ Nane nghumulumba Mulungu, ku soko ye nghani yakwe, holeka nimwitumbiye du Mulungu, hamba si nghogopa yaye. Hambi munhu nha musocele konhenda cici?

⁵ Misi yose wekalaga wakwijiliza zinghani zangu, hambi mahweso gawo gose, nha gali mu wutamisa nene du.

⁶ Wetang'anilaga ho waziwice zawo hamonga, ho wasepe 'ne, wazisunjililaga zose zono nitumaga, wakusepa ho wambulaje.

⁷ Gwe go Mulungu, wuwalipaje wawo i wabi mu nghango yo wubi wawo, wuwagwise hasi kwe likuwo lyako.

⁸ Agwe wuwumanyile wusukangwe wangu, wuwicile cikumbucizo ce mahozi gangu. Wule, zose si zili mu citabu cako?

⁹ Na lono nghukulomba wutazi wako, baho ne walugu wangu wawuyaga ku nyuma. Nane manyiye lukulu, vyono Mulungu yali hamonga nane.

¹⁰ Nane nghumulumba Mulungu ku so nghani yakwe, nghumulumba Muwaha Mulungu, ku so wutazi we nghani yakwe.

¹¹ Nimwitumbiye Mulungu, hamba si nghogopa cinji yaye, Hambi munhu konhenda cici?

¹² Gwe go Mulungu, nowufisiliza wihuwizo wangu kuli'gwe, nane nokulavizya vilavywa vye malumbo.

¹³ Hambi nha wamhonya mwi'fwa, heya kunghamisa ho ndece kugwa hasi, ho njendelele kuwa hali gwegwe go Mulungu, nikale mu wuzelu we womi.