Zabuli 54 - Luganuzi Luswanu Kuli Wanhu Wose 2002

Wulombe wo kwicitila kuli walugu

¹ Gwe go Mulungu wumhonezye mwi'tagwa lyako, wumbice niwe nili mwelecele kwe vilungo vyako.

² Wuhulice wulombe wangu, 'gwe go Mulungu wuzibocele zinghani zangu.

³ Hambi wanhu wedunhumuzi, nha wakunhowanga nawo, i wawulaji nha wakuwulondola wumi wangu, wanhu wono wasina cogopo hamba cidodo ca kuli Mulungu.

⁴ Ninga, ane Mulungu wo wutazi wangu, Muwaha Mulungu, yo kawusikamyaga wumi wangu.

⁵ No wubi we walugu wangu, wuwawuyile weneco, ko wihuwilwa wako, 'gwe go Mulungu wuwongomeze.

⁶ Nane nokulavizya likumbiko kwa nhumbula nzelu, kanyhi nolikumya litagwa lyako so wuswanu wako.

⁷ Hambi nha wakondya kumhonya mu magayo gangu gose, nane nakondya kuwona vyono walugu wangu wose, wakondya kusumwa.