Zabuli 52 - Luganuzi Luswanu Kuli Wanhu Wose 2002

Wuling'anizi wo Mulungu ne lihewa lyakwe

¹ Gwe go munhu 'gwe, socici wukwilumbila wubi wako, kuli wanhu waswanu?

² Agwe kwihwesaga zo wongomeza wayago du, nhondo zose, no lulimi lwako, lwihwanile liceto likali! Agwe kubotaga zo wulambi du mapango gose.

³ Kanyhi agwe, wendile zimbi si nhe ziswanu. Agwe wuwendile u wulambi si nhe mbeka.

⁴ Gwe go mukonji muwaha, agwe wendile zinghani zo kuwatamisa wanji.

⁵ Holeka u Mulungu nayo kokongomeza cibitilila, kokusola no kukuwusa mu nyumba yako, kokukula wuwuce mono'nze, mu yisi yo womi.

⁶ Nawo we ling'ani woziwona zizo, wokogopa, hanyuma wokuseka wawe kutya,

⁷ “Lanjenyi ta zono zimwagane munhu ayu! Mwene si yenda Mulungu yawe wutizizo wakwe, langa mwene yaketumbila winji we sawo yakwe, no kuwulondola mumo wihundiko wakwe!”

⁸ Ninga ane, nihwanile muzeyituni, wono wudedewaye mu Nyumba yo Mulungu. Nane nilwitumbilaga lusungu lwakwe, cibitilila ne cibitilila.

⁹ Gwe go Mulungu, nokulumba vilo vyose, ku soko ye metumo gono wetuma. Nane nokwanza hali wanhu wako, we ling'ani, zo wuswanu wako.