Zabuli 51 - Luganuzi Luswanu Kuli Wanhu Wose 2002

Kulomba wunenelwe

¹ Wumbonele lusungu, 'gwe go Mulungu, mu nghango yo wendo wako wuwaha, wugapatile lukulu masutya gangu, ku soko yo winji wo lusungu lwako.

² Wunyezeze lukulu wavu wangu, wunghweme wubi wangu.

³ Nghuvumila wubi wangu, hambi nha nikaye nghuwuwona wubi wangu, calinze vilo vyose.

⁴ Nane nghusutizya gwegwe du wuli wene, nituma zimbi hali gwegwe. Holeka lono wukuning'aniza, wukunoza viswanu, hambi nha wina ling'ani lono wukundipiciza.

⁵ Ane nha nili musutyi ku wulawa vyono nalelwa, nili mubi ku wulawilila mu'nda ya yaya.

⁶ Ninga agwe wendile winenenyhezi wa mugati, holeka wunyijizaje mahala mu nhumbula.

⁷ Wumbusize wubi, niwe nyelile, wunghweme, ne Hisopo niwe muzelu swee.

⁸ Wumemye nyemo no wusangalale. Wusangalaze kanyhi, ane mono wamhondanga.

⁹ Ninga wulece kuwulanga wubi wangu, wupate masutya gangu gose.

¹⁰ Gwe go Mulungu, wumumbile nhumbula swanu, wumbicile muli'ne nhumbula mhya yono yikamile.

¹¹ Wulece kunhaga kutali nagwe, hamba kumbusiza Muhe wako Mono Yelile.

¹² Wundekaje sangalale, vyono wamhonya, wumhele nhumbula ye cihuliko.

¹³ Nane ho nowejiza i wasutyi ze nzila yako, nawo wanyo wubi, wokuwuyila gwegwe.

¹⁴ Gwe go Mulungu, u Mulungu we mhonelo yangu, wumhonye ne lifwa lyono nojeye nifwe. Nane nokwanza ko lwimbo, vyono agwe kwitumaga ling'ani.

¹⁵ Wundigulaje mulomo wangu, 'gwe go Muwaha Mulungu, ho sume kuzanza zo lukumyo lwako.

¹⁶ Agwe, i mbeka, si wukwendezwa ne likumbiko, yali yiwe si nhavivyo, ane nali nghulavizye. Agwe si wendile vilavywa vinyanywe.

¹⁷ Langa cilavywa cangu kuli'gwe go Mulungu, yo nhumbula du yono yidejepe, hambi 'gwe go Mulungu, nha si kulemaga nhumbula yono yidejepe na ye cihuliko.

¹⁸ Gwe go Mulungu, wulinozezaje ziswanu likaya lya Sayuni, wugazengaje kanyhi wupya majinji ga Yelusalemi.

¹⁹ Ale, baho langa, ho kokwendezwa ne vilavywa vinyanywe, sunga ne vilavywa vinyanyilwe lukulu, sunga ne zinghongolo, nhondo, ho zolavizywa mu cikumbicilo cako.