Zabuli 5 - Luganuzi Luswanu Kuli Wanhu Wose 2002

Kulomba wudimwe mwi'pango lye zimbali

(Kuli mwimbizi, hamonga ne zifilimbi Zabuli ya Dawudi)

¹ Gwe go Muwaha Mulungu wuhulicize zinghani zangu, wuhulice zono nghuzihila mu nhumbula yangu.

² Wuhulicize cililo cangu, 'gwe Mulungu go mutemi wangu, hambi nha yo gwegwe du mono nghulombaga.

³ Gwe go Muwaha Mulungu kulihulikaga lizi lyangu hakali mitondo muno muno, nane nghulavizyaga likumbiko lyangu hakali mitondo, hanyuma niwa nghulanjiliye.

⁴ Agwe yo gwegwe Mulungu mono siwendile wubi, no munhu muhodanji sikokwikala kuli'gwe.

⁵ Ne wedunhumuzi si wokwima hali'gwe, agwe nha wuwasulile wose wono wetumaga wubi.

⁶ Nagwe wukuwa kuwongomeza wose, i walonga zo wulambi, kanyhi kuwakomalaga i wawulaji wose, hamonga ne wakonji wose.

⁷ Ninga ku so winji wo lusungu lwako, ane nosuma kwinjila mu Nyumba yako, nane nohemba mu Nyumba yako yono yelile kwe cogopo.

⁸ Gwe go Muwaha Mulungu wunhongaje mu ling'ani yako, hambi walugu wangu nha wenji muno, holeka wundajile calinze inzila yako hamwande yangu.

⁹ Izinghani ze walugu wangu, si za kwitumbilwa yaye, hambi wuhile wawo, nha wukuleta wongomeze du. Mu zinhumbula zawo wamemile wubi wose, ne mimelo yawo, wenha citenjelo cono cili mwazi, wekalaga wakulonga zo wulambi du.

¹⁰ Gwe go Mulungu, wuwalipicizize mu wubi wawo, wagwe so wuhile wawo wubi, wuwagwize weneco wuwawinjile kutali, ku soko ye masutya gawo menji, hambi nha wakondya kukubedegala agwe.

¹¹ Ninga wose wono wakwihundika Muli'gwe, wasecelele, wembe ko wusangalale vilo vyose, wuwadimaje wose wono wakwendile gwegwe, ho wasangalale ku soko yako.

¹² Hambi 'gwe go Muwaha Mulungu, nha kumumotyaga munhu we ling'ani, kanyhi kumucitilaga nha ngula, ku soko yo lusungu lwako.