Zabuli 47 - Luganuzi Luswanu Kuli Wanhu Wose 2002

Mulungu, u Mutemi we yinze yose

¹ Nye nyo wanhu wose, towenyi maganza, mukumyenyi Mulungu ko wusangalale!

² Hambi Muwaha Mulungu, u Mulungu Mono Yalawiliciye, mono yakogofya. Yo Mutemi muwaha kono'nze kose.

³ Kacipela wusume wo kuwasuma wanhu we makungugo, kagawika makungugo hasi yo wulajilize wetu.

⁴ Kacipela yisi yiyi yiwe wuhazi wetu, yisi yono wo lukumyo lwa Yakobo mono yamwendile.

⁵ U Mulungu kabita kucanyha akuno yakusangalalilwa, Muwaha Mulungu kabita kucanyha, akuno yakutowelwa ne zindulele.

⁶ Ale, mwimbilenyi Mulungu zi nyimbo zo lukumyo, heya mwimbilenyi! Mwimbilenyi Mutemi zi nyimbo, zo lukumyo heya mwimbilenyi!

⁷ Mulungu yo mutemi we yinze yose, holeka mwimbilenyi zi nyimbo zo lukumyo.

⁸ Mulungu yatemile makungugo gose nayo yekaye, mwi'goda lyakwe lyo wutemi lyono lyelile.

⁹ Sunga ne watemi we makungugo, wakwikonghola hamonga ne wanhu wo Mulungu wa Abulahamu. Mwene Mulungu, yali vilungo yacizize mapuga gose ge wasilikale wo wulungu, mwene yamanyice muno muno muli wose.