Zabuli 44 - Luganuzi Luswanu Kuli Wanhu Wose 2002

Kulomba wudimwe

¹ Gwe go Mulungu, ase cihuliciye mu makutu getu sese co weneco, i walezi wetu wacilonjeye ze metumo mawaha, gono wagetuma mu vilo vyawo, heya, metumo gono wagetuma baho katali.

² Vyono yo gwegwe mweneco, mono wawawinga wanhu we makungugo ganji, ne hanhu hawo, wukawa kuwekaza wanhu wako, wukawalipiciza we makungugo ganji, no kuwamotya wanhu wako.

³ Ne wanhu wako hamba si wayisola yisi yiyo, mu nzila yo mumaje, hamba si wasuma kuyitema mu nzila ye vilungo, vyawo weneco, langa wayitema ku so wusume wako ne vilungo vyako, vyono 'gwe wali wuli hamonga nawo, hambi nha wali wuwendile.

⁴ Hambi nha yo gwegwe go Mutemi wangu, kanyhi go Mulungu wangu, mono kuwapelaga cisumisumi wanhu wako.

⁵ Nase, mu vilungo vyako, mo cikuwasumila walugu wetu, heya, sunga cikusuma kuwakanyanjila ku soko ye vilungo vyako.

⁶ Nane hamba singhwitumbila wupinde wangu yaye, hambi nha manyile vyono, hamba mumaje wangu, si wosuma kumhonya yaye.

⁷ Hambi nha yo gwegwe du, mono waciponya mu miwoko ye walugu wetu, wukawasuma wono wali wacisulile.

⁸ Holeka nase nhondo zose, cojendelela kwilumbila muli gwegwe, agwe go Mulungu, kanyhi cojendelela kukulumba sunga cibitilila.

⁹ Ninga 'lu wacitaga, no kucikoza cevu, hamba si wukujendana kanyhi ne mapuga getu.

¹⁰ Wacileka, ciwatize walugu wetu, nawo wakawa kuzisola zisawo zetu.

¹¹ Wukacileka ciwulagwe nhe zingholo, wukawa kuciyagaziza mu makungugo ganji.

¹² Wukawaguza wanhu wako ko wuguzi wupelu, hamba kutuga cambuzi co cose,

¹³ Sunga ne wekalani wayetu, wakuziwona zono wucitendeye, nawo lu, weza kuciseka no kucizwajiza.

¹⁴ Alu wacileka cibedegalwe, ne wanhu we makungugo ganji, wakusinjisa mitwe yawo ko kucibedula.

¹⁵ Misi yose nikaye nghuwona cevu, no wusu wangu wumemile soni zose,

¹⁶ ku soko ye maligo, hamonga no wubedegalwe we walugu wangu, hamonga na wono wasulile.

¹⁷ Zizo zose zakondya kucagana, ninga hamba nhavivyo, ase cikali sinakusemwa yaye, hamba kubena cilagane cako.

¹⁸ Ase cikali si nawa wanhu, wono si cili wehuwilwa kuli'gwe, hamba cikali sinawubedegala wutonji wako.

¹⁹ Ninga hamba nhavivyo, wacileka cisina wutazi wo wose, mu malimu ga mu mbago, wacileka muciligati ye citi ciwaha.

²⁰ Na lono cali ciwe caleka, kukuhemba gwegwe go Mulungu wetu, no kuyimanyhilila milungu yo wulambi,

²¹ agwe go Mulungu, mhali wakondya kuyimanya nghani yiyo, hambi 'gwe nha wuzimanyile zose ze cinyele, zono zili mu zinhumbula.

²² Ninga nase ku soko yako, ciyidomile ne lifwa misi ne cilo. Cikutendelwa nhe zingholo zono zikuwulagwa.

²³ Wusinhuce, alu nhawule wugonile go Muwaha Mulungu? Winukaje, cikukunena wulece kucileka cibitilila.

²⁴ Alu nhawule wukwihundika hali'se, akuno wukusemwa ze magaziko getu, hamonga ne magazo getu?

²⁵ Cenama sunga ho hasi, cahangahanga ne manghundi.

²⁶ Holeka winuce wucitaze, wuciponye ku soko yo wendo wako.