Zabuli 41 - Luganuzi Luswanu Kuli Wanhu Wose 2002

Wulombe wa mono yatamigwe

(Kuli mwimbizi: Zabuli ya Dawudi)

¹ Yo mumoti munhu mono yakuwataza waciwa, u Muwaha Mulungu komutaza nayo, mu vilo vyo wugaye.

² U Muwaha Mulungu komudima no kumuwika ca wumi, no kumupela wumoteswe mono'si hamba sikomuleka mu miwoko ye walugu wakwe.

³ Muwaha Mulungu komutaza mu wutamwa, no kumuponya mu wutamwa wakwe.

⁴ Nane nghawa kutya nhavi, “Ane nghusutizya, 'gwe go Muwaha Mulungu, holeka wumbonele lusungu, wumhonye.”

⁵ Hambi walugu wangu nha wakunonga nghani zimbi, wakuhila nifwe, najililile lukulu.

⁶ Na lono wakuza kunamusa, si wawezaga no wuhile wuswanu yaye, langa wanyihwesezaga zimbi du, ho wabite wakawalonjele wanji.

⁷ Nawo wose wono wasulile, wekalaga wakwipwepwela i zangu, wakunyihweseza i zimbi zono zosuma kunhamisa.

⁸ Akuno wakutya, “Lece ta, wutamwa awu nhondo womuwulaga, hamba si kokwinucila lukulu kanyhi, mu citanda cakwe!”

⁹ Sunga no mwendece wangu muwaha mono nali nimwitumbiye, mono nali kuhangana nayo zindigwa zangu, nayo yakondya kumhituka no kwihoma nane!

¹⁰ Gwe go Muwaha Mulungu, wumbonele lusungu! Wungomolele vilungo vyangu, nane niwalipicize.

¹¹ Na mu nzila yiyo, mo nomanyila vyono mbeka wukwendezwa nane. Hono walugu wangu walece kusumiliza.

¹² Kanyhi vyono ane nitumaga ze ling'ani, holeka agwe kosikamya, nokumbika hali gwegwe cibitilila.

¹³ Yalumbwe Muwaha Mulungu, u Mulungu we Waisilayeli wulawa cibitilila ne cibitilila! Heya! Heya!