Zabuli 40 - Luganuzi Luswanu Kuli Wanhu Wose 2002

Lwimbo lwo lukumyo

(Kuli mwimbizi: Zabuli ya Dawudi)

¹ Nghamulindila Muwaha Mulungu ko wukangalile, nayo yakahuliciza, yakacihulika cililo cangu.

² Yakanimula mwikombo lye zimbali, yakambusa mu nhope namu, yakambika mholile mucanyha ye litalawe, yakazikamya zinghanzo zangu.

³ Yakanyijiza lwimbo lupya, u lwimbo lo kumukumya Mulungu wetu. Nawo wo wenji wono woziwona zizi wokogopa, baho nawo ho womwitumbilo Muwaha Mulungu.

⁴ Yo mumoti munhu mono yamwitumbiye Muwaha Mulungu, u munhu mono sivikwilunza ne wedunhumuzi, wono wakwajilila so wuhemba milungu yo wulambi.

⁵ Gwe go Muwaha Mulungu, go Mulungu wangu, wakondya kucinozeza nghani nyinji zo wizine, ne mahweso gako ku soko yetu, si gakuwalwa yaye, hamba hasina yunji wo wose mono yehwanile gwegwe. Na hono nali sume kuziwala zizo zose, hamba si nali nizimanye liwalo lyayo.

⁶ Agwe si wendile likumbiko hamba wulavye, si wendile vilavywa vinyanywe, hamba cilavywa so wubi, langa wumhelile makutu, ho nghuhulice.

⁷ Holeka nane nghatya, “Nghuza nha vyono nandicilwa mu citabu co wulajilize, ane niwikanize kuwituma wuhile wako, nha vyono nandicilwa mu citabu co Wulajilize.

⁸ Nghusangalala kuwituma zo wuhile wako, go Mulungu wangu, no kuwukamisa wulajilize wako kwe nhumbula yangu yose.”

⁹ Nane niwalonjela mhuga mbaha ye wanhu, zinghani ziswanu ze mhonelo. Gwe go Muwaha Mulungu, agwe wumanyile vyono ane si nanyamala hamba hadodo.

¹⁰ Hamba si nayihundika nghani yiyino mu nhumbula yangu, nha vyono wakondya kumhonya. Nane vilo vyose nizilongaga zo wihuwilwa wako, hamonga na zo wutazi wako. Vyono agwe wuli Mukombozi Mwihuwilwa. Hamba si nayihundicila i mhuga mbaha ye wanhu, u wihuwilwa wako, hamonga no lusungu lwako.

¹¹ Gwe go Muwaha Mulungu, wulece kunyima zo lusungu lwako! Lihewa lyako hamonga no wihuwilwa wako, vyeze kunghamisa nhondo zose.

Kulomba wutazi

¹² Hambi wugaye nha winji wono wumhilime, si wukusumika hamba kuwuwalwe, ne masutya gangu gambaninyhize, hamba si nghusuma no kuwona, hambi nha masutya menji, kuciza winji we zimvwili za mu mutwe wangu, sunga nane nhondo neza sina witumbilo kanyhi.

¹³ Wumhonye, go Muwaha Mulungu, gwe go Muwaha Mulungu, wuze mbela wunhaze!

¹⁴ Ho wose wono wena wuhile wo kunyongomeza, wakozwe cevu, wapuwe! Wawo wono wakunondola wambulaje, nawo wawuye ne nyuma, wakozwe cevu.

¹⁵ Wawo nawo wono wakunzwajiza, wakolwe cevu so wulemwe wawo!

¹⁶ Ninga wose wono wakukulondola, wasangalale no kuwa na nyemo mbaha. Nawo awalya wono wendile ze mhonelo yako, nhondo zose, weze kulonga wakutya, “Yalumbwe Muwaha!”

¹⁷ Gwe go Muwaha Mulungu, ane nili muciwa, kanyhi nili munghwenzele, ninga hamba nhavivyo, agwe si wunasemwa yaye. Agwe yo gwegwe go Mutazi wangu no Mukombozi wangu. Ale wuze, 'gwe go Mulungu wangu, wulece kutinya!