Zabuli 4 - Luganuzi Luswanu Kuli Wanhu Wose 2002

Kulomba wutazi mwipango lye cinyamihe

(Kuli mwimbizi, hamonga ne vitumamilwa vye zinghuzi vye masumbi Zabuli ya Dawudi)

¹ Gwe go Mulungu, go mudimi wangu! Kolo nghukulomba, wuhulicizaje. Lono nali nili mu wugaye, agwe wukanhaza, holeka wumbonele lusungu, wuhulicize wulombe wangu.

² Mwene anye nyo wanhu, alu mojendelela kunhovula sunga nili? Alu ku sokoci mwendile makani go wulele, no kulonga wulambi?

³ Mumanye nha vyono, Muwaha Mulungu yakondya, kwihagulila we ling'ani wakwe. Hambi Muwaha Mulungu, nha kahulicizaga ane lono nghumulomba.

⁴ Mucicime kwe cogopo, mulece kwituma zo wubi. Mwihwesaje muno muno, lono muli mu vitanda vyenyu mutulile.

⁵ Mulavye makumbiko go wiling'ano, akuno mukumwitumbila Muwaha Mulungu.

⁶ Kowali wenji wono walombaga wakutya, “Gwe go Muwaha Mulungu, wucimotyaje muno muno! Kanyhi wucilanje ko lusungu!”

⁷ Kumhela nyemo mbaha mu nhumbula yangu, kuciza wene wawo, hamba wawe wena wuhemba winji hamonga ne divayi.

⁸ Na lono nghutambalala mu citanda, ngonaga nhongo ko mulamu muno, hambi nha yo gwegwe go Muwaha Mulungu wuli wene, mono kundimaga nikala mholile.