Zabuli 34 - Luganuzi Luswanu Kuli Wanhu Wose 2002

Lukumyo kuli wuswanu wo Mulungu

¹ Ane nomukumya Muwaha Mulungu madaha gose, hamba si nolecela lukulu kulutambula lukumyo lwakwe.

² Mutima wangu wokwilumbila muli Muwaha Mulungu, nawo wono wakwiwonelwa, wahulice, wasangalale.

³ Mumukumyaje Muwaha Mulungu hamonga nane, wose hamonga cilikumye litagwa lyakwe.

⁴ Nghamulomba Muwaha Mulungu, nayo yakahuliciza, yakambusiza woga wangu wose.

⁵ Mumupitucilaje Mulungu, ho muwe ne nyemo, ho simokolelwa lukulu cevu.

⁶ Nayo muciwa yamulilila Muwaha Mulungu, nayo yakamuhuliciza, yakamuponya mu wugaye wakwe wose.

⁷ Nayo malayika wo Muwaha Mulungu, kawadimaga wose wono wamogopile, kanyhi kawaponyaga mu zimbali.

⁸ Jezenyi nyo weneco, muwone vyono Muwaha Mulungu muswanu! Wamoti wono wakumwitumbila mwene.

⁹ Ale, mumogopaje Muwaha Mulungu, anye nyo wanhu wakwe, wose wono wamogopile, si wanjilaga cinji yaye.

¹⁰ Sunga ne zisimba nazo hanji, si zitugaga co kulya, ninga wono wamogopilo Muwaha Mulungu, wakwizize vyose.

¹¹ Nzonyi muhulicize anye nyo wadodo, nomwijizenyi mumogope Muwaha Mulungu.

¹² Wule, wendile wuwe na nyemo mu mikalile yako, wikale vilo vinji mu wumote?

¹³ Ale, wulecele lukulu kuzilonga zinghani, zimbi, kanyhi wulecele lukulu kulonga wulambi.

¹⁴ Wilegaje no wubi we mawala gose, witume ziswanu, wulondole mulamu, wuwutyatye.

¹⁵ Hambi u Muwaha Mulungu, nha kawalanjililaga i wanhu we ling'ani, no kuwahuliciza cililo cawo.

¹⁶ Ninga iwetuma zimbi kawasininghalilaga, nawo kolo wafwiza, si wakukumbucilwa kanyhi yaye.

¹⁷ I wanhu we ling'ani, kolo wakumulilila Muwaha Mulungu, nayo kawahulicizaga, no kuwaponya mu magayo gawo gose.

¹⁸ U Muwaha Mulungu yali behi na wose wono wena mahwele, kawaponyaga wose wono wasina witumbilo.

¹⁹ U munhu we ling'ani, katugaga magazo menji, ninga Muwaha Mulungu kamuponyaga muli gose.

²⁰ Muwaha Mulungu kamudimaga muno muno, munhu we ling'ani, na hasina hamba lifupa lyakwe, limonga lyono lyobeneka.

²¹ Wubi wowongomeza i wanhu wabi, na wono wawasulile, i wanhu we ling'ani, wolipicizwa.

²² Muwaha Mulungu kowaponya wanhu wakwe, na wose wono wakutiziza kuli mwene, si wolipicizwa yaye.