Zabuli 31 - Luganuzi Luswanu Kuli Wanhu Wose 2002

Wulombe wo kumwitumbilo Mulungu

(Zabuli ya Dawudi)

¹ Nghutiziza kuli'gwe go Muwaha Mulungu, so wutazi wako, ho ndece kukozwa cevu, wumhonye ko wiling'ano wako.

² Wuteje likutu lyako, wumhonye mbela! Wuweze kuli'ne mudimi mono wukamile, wihundiko wo kumhonya.

³ Heya, hambi agwe nha wuli talawe lyangu, ne gomawakali lyangu. Ku soko ye litagwa lyako, wunongolele, wunhonje.

⁴ Wundavyanize mu mutego wono wanhejile, wunyhitile mu mbali.

⁵ Nghuwuwika muhe wangu mu miwoko yako, wumhonye 'gwe go Muwaha Mulungu, go Mulungu we mbeka.

⁶ Nghuwasula wono wakuyihemba milungu yo wudesi, ninga ane nghwitumbiye gwegwe, agwe go Muwaha Mulungu.

⁷ Nosangalala, no kulusecelelela lusungu lwako, agwe nha kuwuwona wugaye wangu, kuwumanya no wugazice wangu.

⁸ Agwe nha si wandeceleza nibatwe ne walugu wangu, kumbika hanhu hono hapolile.

⁹ Gwe go Muwaha Mulungu, wumbonele lusungu, hambi nha nili mu wugaye, meso gangu gavimba so wulila muno, ne vilungo vyangu vyose vyatimba.

¹⁰ Hambi wikale wangu nha wukumalicila mu wukalale, heya, sunga ne myaka yangu nayo, mu cililo. Nasocela so wugaye sunga ne mafupa gangu gakutama.

¹¹ Sunga ne walugu wangu wose, wakumbedegala, naweza nha linhu du hali wayangu. Ne wendece wangu, weza kumbona nili wa kogofya, nawo lono wakumbona mu nzila, wakunhiza.

¹² Nawo wose wakondya kusemwa nha munhu mono yafwiye, neza nha nili ciya cono citulice.

¹³ Nghuwahulika walugu wangu wakwipwepwela, wogofye wumhilime mbavu zose, wakwihehemeza, ho wambulaje.

¹⁴ Ninga ane nghwitumbiye gwegwe, agwe go Muwaha Mulungu nghutya, “Agwe yo gwegwe Mulungu wangu!”

¹⁵ Nane nhondo zose, nili mu wudimwe wako du, holeka wumhonye mu miwoko ye walugu wangu, na muli wawa wono wakungaza.

¹⁶ Wunanje ko wuswanu wako no mwitumami wako, wumhonye ko lusungu lwako.

¹⁷ Gwe go Muwaha Mulungu, nghukulomba wulece kundeka nghozwe cevu, ninga wuwalekaje i wabi wakozwe cevu, wajilile kuko ku yisi ye wafu.

¹⁸ Wuyidinde milomo ye wanhu wawo walambi, i wanhu wedunhumuzi kanyhi wewoni, wono wakuwabedegala i wanhu we ling'ani.

¹⁹ Lanje ta, wuswanu wako vyono winji, wono wuwawiciye wose wono wakogopile! Kuwanozezaga hali wanhu wose ziswanu, wose wono wakukuziza.

²⁰ Kuwahundikaga hali'gwe hono hapolile, wawa wali kutali no wuhile wubi we wanhu. Kuwahundika hali'gwe wapolile no wuwanji we walugu wawo.

²¹ U Muwaha Mulungu yalumbwe! Hambi mwene nha kandajila zo lusungu lwakwe, lono nali mhilimwe akuno wakunhowanga.

²² Nane nghawa kogopa, no kwihwesa vyono wakondya kundeka, kumbe agwe wali wakondya kucihulika cililo cangu lono nakulilila wunhaze.

²³ Mumwendaje Muwaha Mulungu, anye mo wanhu wakwe! U Muwaha Mulungu, mwene kawadimaga wanhu wose iwehuwilwa. Ninga i wedunhumuzi, kawalipicizaga nha vyono yiwanojeye kulipicizwa.

²⁴ Muweze muli vilungo no kuwa ne nhumbula yono yisina woga, anye wose mono mumwitumbiye Muwaha Mulungu.