Zabuli 30 - Luganuzi Luswanu Kuli Wanhu Wose 2002

¹ Nghukukumya go Muwaha Mulungu, hambi nha wambusa mu mbali, hamba si wuwaleceleze walugu wangu wasimanje.

² Gwe go Muwaha Mulungu, go Mulungu wangu, nakulilila, nagwe wukamhonya.

³ Gwe go Muwaha Mulungu, wakondya kumhonya mu wulawa mu citenjelo, wakondya kumhonya no kumbusa mu muhinzo, wo kugwila mugati ye likombo litali.

⁴ Mukumyenyi Muwaha Mulungu na nyimbo, anye mo wanhu wakwe wehuwilwa. Muwukumbucilaje wele wakwe no kumukumya.

⁵ I likuwo lyakwe nha lili hadodo vivi du, langa lusungu lwakwe, lwikalaga cibitilila. I cililo ciwezaga mu cilo du, ninga hakali mitondo, yiwezaga nyemo.

⁶ Mu wumote wangu natya, “Sinosinjisika yaye!”

⁷ Gwe go Muwaha Mulungu, ku soko yo lusungu lwako, wakondya kunghamya nhe'tunda yiwaha. Ninga hamba nhavivyo, wukehundika kutali nane, sunga nane nghawa kwanza kutuga woga.

⁸ Nghakulilila gwegwe go Muwaha Mulungu, nghakunena gwegwe go Muwaha Mulungu,

⁹ “Alu hono nifwe, agwe kotuga cambuzici? Alu cowa cambuzici hono ngwile mwikombo? Hamba manghundi lo, gosuma kukukumya? Hamba kwanza zo wuswanu wako wuwaha?

¹⁰ Hulice go Muwaha Mulungu, wumbonele lusungu, 'gwe go Muwaha Mulungu, wunhazaje!”

¹¹ Gwegwe kuwupitula wukalale wangu, wuwa wuvina wa nyemo, kumbusiza wukalale wangu wose, kumhela nyemo mbaha kuciza.

¹² Holeka nane sinonyamala twii, aa ng'o, langa nojendelela kukwimbila nyimbo zo lukumyo. Nowa kukulumba cibitilila, 'gwe go Muwaha Mulungu, u Mulungu wangu.