Zabuli 3 - Luganuzi Luswanu Kuli Wanhu Wose 2002

Kulomba wutazi mwipango lye hakali mitondo

(Zabuli ya Dawudi lono yamutizaga Abusalomu)

¹ Gwe go Muwaha Mulungu, i walugu wangu nha wenji, kanyhi wenji muno wono wali suta nane!

² Howali wenji muno wono wakutya, “Ati agwe go Mulungu sikosuma kunhaza!”

³ Ninga agwe go Muwaha Mulungu, wuli ngula yangu, nane nghwilumba no kutuga wuluwuce ku soko yako.

⁴ Nane nghumulilila Mulungu kwe'zi, ho yanhaze, nayo kamhitulaga mu wulawa mwi'tunda lyakwe lyono lyelile.

⁵ Holeka alu nane nosuma kugona nhongo no kwinuka kanyhi. Hambi u Muwaha Mulungu nha yakunghamisa.

⁶ Nane hamba sinowogopa maelufu ge wanhu, wono wamhilime kose kose.

⁷ Wuze 'gwe go Muwaha Mulungu! Wumhonye, gwe go Mulungu wangu! Hambi nha yo gwegwe mono kuwabenaga nzagasa i walugu wangu wose, kanyhi kuwabenangaga meno gawo i wanhu wabi, ho walece kunhamisa.

⁸ Agwe go Muwaha Mulungu, yo gwegwe du mono kuponyaga, ale wuwamotyaje wanhu wako.