Zabuli 26 - Luganuzi Luswanu Kuli Wanhu Wose 2002

Wulombe wo munhu muswanu

(Zabuli ya Dawudi)

¹ Gwe go Muwaha Mulungu, wumbalaje'ne sina wubi, hambi nha nitumaga du ziswanu, nane nghwitumbiye gwegwe, hamba sina mahwele yaye.

² Go Muwaha Mulungu, nghulomba wunjele, wumhime, wugalanje mahala gangu, ne nhumbula yangu.

³ Hambi lusungu lwako nha lo lukunongoza nane, njendelaga mu mbeka yako.

⁴ Sinikalanaga ne wanhu we caka caka yaye, hamba sinilunzaga hamonga ne wanhu wakoci.

⁵ Sinyendile hamba hadodo, kuhangahanga ne wanhu wono wetumaga zo wavu, hamba sinokwilunziza lukulu ne wanhu wabi.

⁶ Ane nghwizuguza miwoko yangu, 'gwe go Muwaha Mulungu, ho ndajile vyono ane nili mutelevu, nghwilunza no wihangulize wo wuhembi, mu wupilime we cikumbicilo cako,

⁷ akuno nghwimba no lwimbo lo kukulumbiza gwegwe, hamonga no kwanza ze metumo gako go wizine.

⁸ Gwe go Muwaha Mulungu, nyendile wikalo wa mu nyumba yako, ihanhu hono lwikaye u lukumyo lwako.

⁹ Wulece kumbaliliza hamonga ne wanyo wubi, hamba wulece kunhajiliza hamonga ne wanhu wawulaji,

¹⁰ i wanhu wono wekalaga wakulya mafupo vilo vyose.

¹¹ Ninga 'ne, nitumaga zo wiling'ano du, wumbonele lusungu wumhonye.

¹² Nimile mholile, kanyhi nghamile, baho ho nomukumizya Muwaha Mulungu, mu wihangulize wuwaha we wanhu.