Zabuli 21 - Luganuzi Luswanu Kuli Wanhu Wose 2002

Wulumbe ku soko yo wusume

(Kuli mwimbizi: Zabuli ya Dawudi)

¹ Gwe go Muwaha Mulungu, U Mutemi yakusangalala ku soko ye vilungo vyono wumupeye, yakusecelela ku soko yo wusume wono wumupelile.

² Kumufisiliziza wuhile wa mu nhumbula yakwe, hamba si wumwimile cisakwa cakwe.

³ Kumuziza kuwa kumupela wulugute no wumoteswe, kumuvwika mu mutwe mukumbo we zahabu yono yilenguce.

⁴ Yakakulomba wumi, nagwe wukamupela vilo vinji, vyo wikale cibitilila.

⁵ Yena lukumyo ku soko yo wutazi wako, yo gwegwe mono wumupelile lilumbo no wogopwe.

⁶ Wukumunoza yawe mulugutwe cibitilila, u wijele wako, wukumumemya nyemo.

⁷ Gwe go Muwaha Mulungu, mutemi yakwitumbiye gwegwe, nayo kowa yapolile so lusungu lwako, go Mulungu Mono Yalawiliciye Muli Vyose.

⁸ U muwoko wako wowaficila i walugu wako wose, u muwoko wako wo kulume, wowebata wose wono wakusulile.

⁹ Nagwe kolo wukuza, kowaticimiza mwi'kozo lyo moto, i likuwo lyako go Muwaha Mulungu, lyowongomeza, no moto wowatakamiza.

¹⁰ Lulelo lwawo lopatilwa lukulu mono'nze, ne wana wawo, si wolosigala mu wanhu.

¹¹ Hamba wanoze wusugu, hamba wawe no wuhile wubi wo kukutamisa, awo wowa wibahule wa bwete, hamba siwosuma kwituma cinji.

¹² Hambi agwe nha kowakulumhusa lumangho, ko kuwalunga ne zisonga zako, mu wusu wawo.

¹³ Wulumbwe 'gwe go Muwaha Mulungu, ku soko ye vilungo vyako! Nase cokwimba no kuvikumya i vilungo vyako.