Zabuli 20 - Luganuzi Luswanu Kuli Wanhu Wose 2002

Kulomba wusume

(Kuli mwimbizi: Zabuli ya Dawudi)

¹ U Mulungu yakuhulicize lono wuli mu wugaye, i litagwa lyo Mulungu wa Yakobo, lyeze wo wutizizo wako.

² Yakuletele wutazi ku wulawa hono helile hakwe, yakusikamye kulawa mwi'tunda lya Sayuni.

³ Yagakumbucile makumbiko gako gose, yalibocele ne likumbiko lyako linyanywe.

⁴ Yakupele vyono wukuhila mu nhumbula yako, yagafisilize i mahweso gako gose.

⁵ Baho, nase ho cosecelela ku soko yo wusume wako, cozinula zibendela ko kulikumya litagwa lyo Mulungu wetu. U Muwaha Mulungu yakupelaje visakwa vyako vyose!

⁶ Alu nakondya kumanya vyono Muwaha Mulungu, kamupelaga wusume u mutemi muhagulwa wakwe, kanyhi kamuhulicizaga ku wulawa hono helile hakwe ku wulanga, kanyhi kamupelaga wusume ko muwoko wakwe we vilungo.

⁷ Wanji wetumbilaga mituka yo wulugu, wanji nawo wetumbilaga zifwalasi zawo. Ninga ase, cimwitumbiye u Muwaha Mulungu, u Mulungu wetu.

⁸ Wene wawo wekobalaga no kugwa hasi, ninga ase cikwinuka no kwima wima.

⁹ Gwe go Muwaha Mulungu, wumupelaje mutemi wusume, kanyhi wucihulicize lono cikukulomba.