Zabuli 2 - Luganuzi Luswanu Kuli Wanhu Wose 2002

U Mutemi muhagulwa wo Mulungu

¹ Alu socici wanhu we makungugo, wakuleta zo wutilibule? Nhawule wanhu wakwihehemeza bwete?

² Watemi wa mononze wakwiwikaniza, wawaha nawo wakwiheha hamonga, ho wamubedegale Muwaha Mulungu, hamonga no mwitilwa mafuta wakwe muhagulwa!

³ Wakutya, “Alenyi ciyiwuse mu wulongola wawo, kanyhi cigawopole ne manyolo gawo!”

⁴ Nayo Muwaha Mulungu mono yali ku wulanga, yakuwaseka no kuwezwajiza.

⁵ Holeka kolonga nawo kwe'kuwo, no kuwogofya ko wukali.

⁶ “Namutemya mwitilwa mafuta wangu, yatemile ku Sayuni, litunda lyangu lyono lyelile!”

⁷ Nayo mwitilwa mafuta yakutya, “Nowanza wuhile wo Muwaha Mulungu. Muwaha Mulungu yanonjela yakatya, ‘Agwe wuli mwanangu, zuwali nghulela.

⁸ Ale wulombe kuli'ne nane nokupela makungugo gawe wuhazi wako, ne yinze nayo yose yiwe sawo yako.

⁹ Nagwe kowapondanjiza ne nghome ya cuma, kanyhi kowatulanga nha nyungu yo muwumbi!’ ”

¹⁰ Holeka 'lu anye nyo watemi, mwitumamilaje mahala, hulicizenyi uwukagwe wuno, anye mo wawaha we yinze.

¹¹ Ale, mumwitumamilaje Muwaha Mulungu kwe cogopo, mucicime kanyhi mumufugamile,

¹² hono mulece kunoza nhavivyo, mwene kosimba nanye mokongomezwa, hambi likuwo lyakwe nha lyakaga nhinicizo. Nyemo mbaha kuli wose wono wakwihundika muli mwene!