Zabuli 18 - Luganuzi Luswanu Kuli Wanhu Wose 2002

Lwimbo lwa Dawudi lwo wusume

¹ Nghwendile, 'gwe go Muwaha Mulungu wangu, yo gwegwe go Vilungo vyangu!

² Muwaha Mulungu, gwegwe wo wutizizo wangu, ne ligomawakali lyangu. Yo gwegwe Mulungu wangu, ne litalawe lyangu, nghutiziza kuli mwene ho niwe mholile, mwene yo ngula yangu, yo Mukombozi wangu mono yali vilungo.

³ Nane nghumulilila Muwaha Mulungu, mono yanojeye lukumyo, yanhaze, nane nghuponywa kuli walugu wangu.

⁴ Lifwa lyali limhilime mbavu zose, ne mawingo go wongomele gali gangwiliye,

⁵ ne zimbali ze lifwa, zali zimhilime, vidoga vye mitego ye citenjelo, vyali vinanjile.

⁶ Nghamulilila Muwaha Mulungu mu wugaye, nghamucemeleza Mulungu wangu yanhaze. Nayo yakalihulika lizi lyangu mu Nyumba yakwe, cililo cangu cikamuficila mu makutu gakwe.

⁷ Baho yisi yikasinjisika no kucicima, ne misinji ye matunda nayo yikayumbayumba, vyono Mulungu yali yakolwa likuwo.

⁸ Lyosi likakomoka kulawa mu zimhula zakwe, no moto mukali wukalawila mu mulomo wakwe, ne makala go moto gakalipuka kulawa kuli mwene.

⁹ Yakawudigula wulanga, yakatima hono hasi mwi'vunde lititu.

¹⁰ Yakagulucila mucanyha ye likelubi, yakajendela mumo mu mabawa ge mbeho musunho.

¹¹ Yakegubika citi mbavu zose, ne mavunde mazito ge malenga gakamupilima.

¹² I mamuli gakamulika, ha mwande yakwe ne mvula ye mabwe, hamonga ne malambi go moto, vyose vikalawila kulawa mwi'vunde,

¹³ Muwaha Mulungu yakadidima kulawa ku wulanga, ne lizi lya Mono Yalawiliciye likahulikwa. Yikatonya mvula ya mabwe ne makala go moto.

¹⁴ Yakawaguma walugu wakwe kwe zisonga zakwe, yakaweyagaza, yakawamulisiza limuli, yakawawinga.

¹⁵ Gwe go Muwaha Mulungu, lono wawatacilila walugu wako, wali weza kuwogofya kwe likuwo lyako, ivisolo vye lilenga vyagubulwa, ne misinji ye yinze, nayo yikejela calinze.

¹⁶ U Mulungu yakagolola muwoko wakwe, ku wulawa ku wulanga, yakanyibata yakanimula mu wulawa mu malenga menji.

¹⁷ Yakamhonya kuli walugu wangu, wono wali vilungo muno, yakamhonya kuli walya wono wasulile, hambi nha wali wanyhizize vilungo 'ne.

¹⁸ Wahungucila lono nali nili mu wugaye, ninga hamba nhavivyo, Muwaha Mulungu yanyhitila kuli wene.

¹⁹ Yanimula, yakambika hono hapolile, yanhaza vyono yali yendezwe nane.

²⁰ Muwaha Mulungu yamhela cihumbilizwa, vyono 'ne netuma zo muling'ano yahumbiliza vyono nali sina wuhoswe.

²¹ Ane niyityatyaga nzila yo Muwaha Mulungu du, hamba nghali namuleka Mulungu wangu.

²² Nigebate malajilizo gakwe gose, nghali si ninaleka kuwutyatya wutonji wakwe.

²³ Sina wusutye hali mwene, nghwilanjilila ho ndece kusutya.

²⁴ Muwaha Mulungu yakumhela cihumbilizwa ku soko, vyono nghwituma ziswanu, mwene yamanyile vyono ane sina wuhoswe.

²⁵ Agwe wuli mwihuwilwa kuli wono wehuwilwa, kanyhi wuli muswanu kuli wanhu waswanu.

²⁶ Agwe nha wukwilaniciye kuli wono wakwilaniciye, ninga wuli mukali kuli wanhu wabi.

²⁷ Agwe kuwaponyaga wenenenyhezi, no kuwagwisa wedunhumuzi.

²⁸ Gwegwe go Muwaha Mulungu, go Mulungu wangu, yo gwegwe mono kumulicilaga, yo gwegwe mono kumbusizaga citi cangu.

²⁹ Ko wutazi wako, nghuwahoma walugu wangu, kumhelaga vilungo vyo kuzumhila lijinji.

³⁰ Mbeka metumo gakwe gasina wuhoswe! No wihuwizo wo Muwaha Mulungu wa mbeka, mwene yo ngula ya wose wono wamwitumbiye.

³¹ Alu nani 'mbi kanyhi Mulungu, hamba nani 'mbi, kanyhi mono lye 'talawe lyo wutizizo, hono si gwegwe du go Mulungu wetu?

³² U Mulungu yo kamhelaga vilungo, yo kayinozaga nzila yangu yiwa yipolile.

³³ Kayinozaga migulu yangu yiwa yikamile nha ye mbala, kawa kunyimya nghamile mucanyha ye litunda.

³⁴ Kanyijizaga zinzila zo kwihoma ne wulugu, miwoko yangu yisume kuwukwega wupinde we shaba.

³⁵ Kumhela ngula yako yo kumhonezya, no muwoko wako wo kulume wunyibate. No wutazi wako, wukumbilusa.

³⁶ Kumbusizaga vimizi vya mu nzila, nane nghali sinagwa hamba hadodo.

³⁷ Nane nghuwatyatilila i walugu wangu no kuwebata, hamba sinowuyila lukulu ne nyuma, sunga niwongomeze.

³⁸ Nane nghuwagwisa hasi hamba siwokwinuka kanyhi, wakugwa hasi yangu, wasumwa.

³⁹ Agwe yo gwegwe mono wukumhela vilungo, vyo kwihomela ne walugu, kuwagwisaga walugu hasi yangu.

⁴⁰ Wawanoza walugu wangu watize, na awalya wono wasulile, nghawongomeza.

⁴¹ Wazoza izozo yiwaha, ninga hakawa hasina hamba yumonga wo kuwaponya, wamulilila Muwaha Mulungu, ninga nayo hamba kuwahuliciza yaye.

⁴² Nane nghawatindya wakawa nhe nghundi, lyono likupemheluswa ne mbeho, nghawa kuwagumila kunze nhe madabaga mu nzila.

⁴³ Agwe kumhonya kuli wabedegazi, no kunoza niwe mutemi kuli makungugo. Ne wanhu wono si niwamanyile wo wonyitumamila.

⁴⁴ Ne wajenzi wonyiziza kwe cogopo, nawo wohulika kamonga du, kolo wakuhulika i zangu.

⁴⁵ Wajenzi nawo, wusugu wawo womalika, wolawila wakucicima mu magomawakali gawo, no kunyiziza ko woga wuwaha.

⁴⁶ U Muwaha Mulungu yo mumi! Yalumbwe, u mudimi no wihundiko wangu. Ale, mumukumyaje Mulungu mono yakumhonya.

⁴⁷ Mwene kamhelaga wusume kuli walugu wangu, yakugawika makungugo hasi yangu.

⁴⁸ Yakumhonya kuli walugu wangu, yakumhela wusume kuli wono wakumhingamhinga, yakunyhitila kuli watamisi.

⁴⁹ Gwe go Muwaha Mulungu, ane nokulumbila haciligati ye wanhu we makungugo, nokwimbila zinyimbo zo kukukumya.

⁵⁰ U Mulungu kamupelaga mutemi wakwe cisumisumi ciwaha, kamulajilaga u muhagulwa wakwe wuswanu wakwe. Heya, wendo kuli Dawudi, hamonga no lulelo lwakwe sunga ku cibitilila.