Zabuli 17 - Luganuzi Luswanu Kuli Wanhu Wose 2002

Wulombe wo munhu muswanu

(Ulombe wo Dawudi)

¹ Gwe go Muwaha Mulungu, wuhulicize cililo cangu ce mbeka, ubocele wulombe wangu wa mu nhumbula, wono wusina wulambi.

² Yo gwegwe mono kunhetelaga, agwe kuwonaga ze ling'ani.

³ Agwe wuyimanyiye lukulu nhumbula yangu kunyiziza ne cilo, kunyihenga hamba kuwona cinji cibi muli'ne.

⁴ Kuli ze metumo ge wanhu, ane sinongaga zimbi, nha vyono wanozaga wanji, nilibate lilajilizo lyako, singhutyatya nzila ze wawulaji.

⁵ Nhyatyaga nzila yako nhondo zose, nghali si ninayileka hamba hadodo.

⁶ Nane nghukucemeleza, 'gwe go Mulungu, hambi nha kuhulicizaga, holeka wuteje likutu lyako, wuzihulicize zinghani zangu.

⁷ Wuwulajilaje lusungu lwako, wuwakomboze kuli walugu wawo, wose wono wakutiziza kuli'gwe.

⁸ Wunghamisaje, nha vyono kuyikamisaga nenje ye liso lyako, wuhundice mu mubeho we mabawa gako,

⁹ ho niwe kutali no wihomi we wabi i walugu wamhilime,

¹⁰ wasina lusungu hamba hadodo, wamemile nghani zo widunhumuzi.

¹¹ Alu wanhejile wamhilime kose kose wakuhila wangwise hasi.

¹² Wewikanize wahawanje nha simba, nha vyono nyana ye simba yisepaga mhelembo yayo.

¹³ Wuze, 'gwe go Muwaha Mulungu mwihome nawo, wuwagwise hasi wumhonyaje kuli wanhu wabi ko mumaje wako.

¹⁴ Gwe go Muwaha Mulungu, wumhonyaje no muwoko wako kuli wanhu wawo, i wanhu wono walangaga za mu sawo ya mononze yiyi du. Wuwalipicizaje kwe magayo gono wawawicila, gawe gawakwiliye ne wana wawo, wawalecele sunga ne wezukulu zawo.

¹⁵ Ninga ane nokuwona, hambi nha sina wusutye, nane kolo neza kwinuka, nowa nina nyemo ku soko yo kukuwona.